Mae M-SParc a Hwb Gwyddorau Bywyd Cymru yn falch o gyhoeddi partneriaeth newydd a chyffrous, i gyflymu arloesedd mewn iechyd a gofal cymdeithasol yng Nghymru.
Bydd y cydweithrediad newydd hwn yn cysylltu arloeswyr, ymchwilwyr, clinigwyr ac entrepreneuriaid sy'n meddwl ymlaen ac yn creu piblinell gadarn o brosiectau a busnesau cyffrous. Bydd cyfuno ecosystem arloesi bywiog M-SParc â gwybodaeth a rhwydweithiau arbenigol y sector Hwb Gwyddorau Bywyd Cymru yn helpu i wireddu syniadau arloesol, gan ddarparu buddion iechyd ac economaidd.
Yn gartref i dros 50 o fusnesau arloesol, mae M-SParc yn cefnogi uchelgais, arloesedd a menter ledled Cymru - gan adeiladu ecosystem gysylltiedig, gydweithredol sy'n tanio uchelgais a chynnydd. Mae Hwb Gwyddorau Bywyd Cymru yn bodoli i helpu i yrru arloesiadau ysbrydoledig ym maes gwyddor bywyd i ddefnydd rheng flaen mewn iechyd a gofal cymdeithasol ledled Cymru. Mae'r sefydliad sydd wedi'i leoli yng Nghaerdydd yn cefnogi diwydiant, y byd academaidd, iechyd a gofal cymdeithasol i wneud Cymru yn lle o ddewis ar gyfer arloesi iechyd, gofal a lles.
Syniadau Lleol, Effaith Byd-eang
Nod y bartneriaeth yw meithrin prosiectau sy'n datrys heriau iechyd y byd go iawn, boed hynny drwy atebion iechyd digidol, dyfeisiau meddygol a datblygiadau biotechnolegol. Gyda'i gilydd, bydd y sefydliadau'n darparu canllawiau, mynediad at gefnogaeth arbenigol a llwyfan cydweithredol i arloeswyr ym mhob cam o'u datblygiad.
Dywedodd Pryderi ap Rhisiart, Rheolwr Gyfarwyddwr, M-SParc:
“Mae cydweithio â Hwb Gwyddorau Bywyd Cymru wedi bod yn allweddol wrth gyflawni mentrau effeithiol fel y rhaglen Iechyd a Mwy, dw i bellach yn arbennig o gyffrous wrth i ni lansio ein partneriaeth strategol newydd, sy'n nodi newid sylweddol yn y ffordd dan ni’n gyrru arloesedd iechyd yng Ngogledd Cymru. Gyda'r ysgol feddygol newydd ym Mhrifysgol Bangor ar ein stepan drws, mae'r cydweithrediad yma rhwng M-SParc a Hwb Gwyddorau Bywyd Cymru mewn sefyllfa berffaith i gataleiddio newid ystyrlon mewn iechyd a gofal cymdeithasol ar draws y rhanbarth.”
Dywedodd Dr Naomi Joyce, Pennaeth Partneriaethau, Hwb Gwyddorau Bywyd Cymru:
“Mae partneru ag M-SParc yn caniatáu inni gysylltu ag arloeswyr ledled gogledd Cymru mewn ffordd fwy ystyrlon. Mae'n ymwneud â chreu cyfleoedd ar gyfer cydweithio, cefnogi mentrau newydd cyffrous ac yn y pen draw sicrhau canlyniadau iechyd gwell i gleifion.”
Beth sydd nesaf?
Bydd y cylch cyntaf o brosiectau cydweithredol yn cynnwys gweithdai arloesi, ceisiadau am gyllid a digwyddiadau penodol i'r sector a fydd yn annog cydweithio rhwng y byd academaidd, y GIG a diwydiant. Gan fod sylfeini cryf ar waith nawr, mae M-SParc a Hwb Gwyddorau Bywyd Cymru yn edrych ymlaen at ddyfodol lle bydd arloesi Cymru yn cyfrannu at atebion iechyd byd-eang.
Os ydych chi wedi'ch lleoli yng ngogledd Cymru ac yn dymuno cydweithio neu'n credu y byddech chi'n elwa o gefnogaeth i ddatblygu eich syniadau, fe'ch anogir i gysylltu â gwenllian@m-sparc.com am sgwrs gychwynnol.