Mae ein tîm Gwybodaeth y Sector yn troi marchnadoedd a syniadau cymhleth yn ddealltwriaeth glir y mae modd gweithredu ar ei sail. Rydym yn darparu ymchwil wedi’i theilwra sy’n helpu arloeswyr i ddeall tirweddau a chanfod cyfleoedd a heriau. P’un a oes arnoch angen gwasanaeth cyfarwyddo cyflym ynteu archwiliad strategol dwfn o gyflwr y sector, byddwn yn gweithio gyda chi i gwmpasu’r lefel gywir o wybodaeth ar gyfer eich anghenion.
Rydym yn cynnig cefnogaeth ar ffurf gwahanol fathau o adroddiadau yn dibynnu ar yr hyn sydd ei angen. Mae’r adroddiadau hyn yn darparu gwybodaeth ar sail tystiolaeth a fydd yn helpu rhanddeiliaid i ddeall tirwedd y farchnad, gan gynnwys gweithgarwch allweddol, tueddiadau, cyfleoedd a heriau. Byddwn yn gweithio gyda chi i gwmpasu’r adroddiad i sicrhau ei fod wedi’i deilwra i’ch anghenion.
| Math o adroddiad | Dyfnder a ffynonellau data nodweddiadol | Hyd (yn fras) | Amser paratoi (yn fras) | Dyma sydd orau pan mae angen... |
|---|---|---|---|---|
| Golwg Gyflym | Ymchwil marchnad eilaidd sy’n ymateb yn gyflym | < 15 tudalen | 1-2 wythnos | Gwasanaeth cyfarwyddo cyflym a chryno: pwy sy’n weithgar, beth sydd ar y farchnad, ble mae’r bylchau posibl. |
| Adroddiad Gwybodaeth | Ymchwil eilaidd ddyfnach ynghyd â mewnbynnau cynradd dethol. Ffurf hirach a dadansoddiad manylach. | 15-30 tudalen | 2-6 wythnos | Darlun mwy cyflawn: maint y farchnad, tueddiadau, sbardunau/rhwystrau, cyfran cystadleuwyr - a lle ar gyfer elfennau wedi’u teilwra. |
| Adroddiad ar y Sector | Darlun cyfannol o segment cyfan o wyddor bywyd (mapio technegol ac economaidd, mapio'r farchnad a chapasiti Cymru) | > 30 tudalen | 4-8 wythnos | Gwaith cyfeirio strategol, “cyflwr y sector” sy’n sail i bolisi, rhaglenni traws-randdeiliaid neu gynlluniau caffael mawr. |
| Adroddiad ar Wlad | Yr un dyfnder ag Adroddiad Gwybodaeth, ond â phwyslais daearyddol (ar un genedl, neu gymharu sawl gwlad) | 15-30 tudalen | 2-6 wythnos | Golwg fanwl ar sut mae systemau iechyd penodol yn mynd i’r afael â her, neu weithgarwch yn y farchnad mewn rhanbarth penodol. |
Mae ein tîm Gwybodaeth y Sector yn cefnogi prosiectau ar sail y galw gan randdeiliaid, perthnasedd rhaglenni strategol, argaeledd data, a chapasiti adnoddau. Rhaid i’r gwaith arloesi neu'r prosiectau a gefnogir ganolbwyntio ar y budd i iechyd a gofal cymdeithasol, a rhaid iddynt gael effaith amlwg ar Gymru.
Rydym yn cynnig cymorth ymarferol i Fyrddau Iechyd drwy eu helpu i ddatblygu neu gryfhau eu hachosion busnes. Mae hyn yn cynnwys helpu timau i ddeall a gweithio gyda Model Pump Achos y Trysorlys neu’r templedi penodol a ddefnyddir gan fyrddau iechyd unigol Cymru. Mae ein cymorth yn cwmpasu ychwanegu gwybodaeth am y farchnad a’r system, darparu adborth adeiladol, ac adolygu drafftiau’n feirniadol fel bod achosion yn egluro’r angen yn glir, yn dangos y manteision i gleifion a’r system, ac yn cyflwyno cynllun realistig i’w fabwysiadu.
Rydym yn gweithio gyda sefydliadau sy’n datblygu arloesedd ym maes iechyd a gofal cymdeithasol a fydd o fudd i gleifion, yn gwella GIG Cymru, ac yn rhoi hwb i economi Cymru.
Mae ein cefnogaeth wedi’i theilwra ar gael i academyddion, partneriaid yn y diwydiant, clinigwyr, awdurdodau lleol, ac elusennau. Rhaid i arloeswyr/rhanddeiliaid cymwys ganolbwyntio ar roi budd i iechyd a gofal cymdeithasol, a rhaid iddynt gael effaith amlwg ar Gymru.
