Mae ein gwasanaeth cymorth cyllido yn helpu arloeswyr i ganfod a sicrhau cyllid grant yn llwyddiannus.

Drwy weithio gyda ni, rydych chi’n elwa ar gymorth wedi’i deilwra, ein harbenigedd, ein rhwydweithiau helaeth, a’n llwyddiant blaenorol, gan roi mantais gryfach a mwy cystadleuol i’ch cais.

Sut gallwn ni helpu?  

  • Cyfeiriadur Cyllid - Cipolwg ar y cyfleoedd diweddaraf am gyllid ym maes iechyd a gwyddorau bywyd – o gronfeydd sbarduno, asesu a dilysu, ac ymchwil a datblygu, i grantiau ar gyfer teithio a chynadleddau. 
  • Eich cyfeirio at gyfleoedd - Oes gennych chi syniad arbennig, ond ddim yn siŵr ble i ddechrau? Gallwn ni eich cyfeirio chi at alwadau cyllido perthnasol, gan sicrhau eich bod chi’n gymwys ac yn bodloni’r meini prawf. Mae gennym ddealltwriaeth o ba gyfleoedd sy’n cyd-fynd orau â phob cam o ddatblygiad eich arloesiad, a fydd yn arbed amser i chi ac yn gwella eich siawns o lwyddo.
  • Gwybodaeth am gyllid - Mae gennym ni fynediad at gronfa ddata gynhwysfawr o alwadau, rhaglenni a chynlluniau cyllido. Rydym yn monitro ffynonellau cyllid cenedlaethol a rhyngwladol yn barhaus.
  • Adolygu ceisiadau - Oes gennych chi ddrafft o gais am gyllid yn barod? Gall ein tîm adolygu, golygu a phrawfddarllen eich cais i sicrhau ei fod yn glir, yn afaelgar, ac yn barod i’w gyflwyno. Mae gennym brofiad o gefnogi nifer o geisiadau llwyddiannus, felly gallwn helpu i gryfhau eich naratif, eich tystiolaeth, a’ch effaith gyffredinol.
  • Creu Consortiwm - Oes angen partneriaid arbenigol arnoch chi i’ch cynorthwyo â’ch prosiect arloesi?  Gallwn ni eich helpu chi i ffurfio partneriaethau strategol drwy eich rhoi mewn cyswllt â chydweithwyr o’r byd academaidd, o’r diwydiant, ac o’r GIG. Gyda’n rhwydwaith helaeth ar draws ecosystem arloesi Cymru, gallwn eich cyflwyno i bartneriaid hygred a fydd yn cryfhau eich cynnig ac yn ei wneud yn fwy cystadleuol.

 

Pwy sy’n gymwys i dderbyn ein cymorth?  

Rydym yn gweithio gyda sefydliadau i ddatblygu arloesedd ym maes gofal iechyd a fydd o fudd i gleifion, yn gwella GIG Cymru, ac yn rhoi hwb i economi Cymru.

Mae ein cefnogaeth wedi ei deilwra ac ar gael i academyddion, partneriaid yn y diwydiant, clinigwyr, awdurdodau lleol ac elusennau. 

Rydym yn awyddus i gefnogi ceisiadau am gyllid gyda'r meini prawf canlynol: 

  • Rhaid i’ch prosiect arloesi ganolbwyntio ar roi budd i iechyd a gofal, a disgwylir y bydd yn cael dylanwad amlwg yng Nghymru.
  • Er nad oes angen i geisiadau gan sefydliadau academaidd neu fyrddau iechyd fod yn geisiadau cydweithredol bob amser, rydym yn annog sefydliadau i gydweithio am ei fod yn cryfhau eich cais.
  • Os ydych chi’n fusnes sy’n chwilio am gefnogaeth, bydd rhaid i’ch cais ddangos eich bod yn cydweithio â sefydliad arall, fel sefydliad academaidd neu fwrdd iechyd.
  • Os oes angen cymorth ariannol sydd ddim yn gyllid grant, gallwn ni eich cyfeirio at Busnes Cymru a/neu Banc Datblygu Cymru.