Mae’r gofod arloesi yn llawn newyddion, syniadau, gwybodaeth a chymorth. Gall cadw’ch bys ar y pwls fod yn dasg heriol, ond un o’r ffyrdd gorau o wneud hynny yw drwy gylchlythyrau.
Rydyn ni wedi casglu’r cylchlythyrau gorau at ei gilydd er mwyn ei gwneud yn haws i chi gadw golwg ar y datblygiadau diweddaraf yn eich maes, boed hynny ym maes iechyd, gofal cymdeithasol, technoleg feddygol, ymchwil neu dechnoleg ddigidol.
Corff aelodaeth proffesiynol yw Cymdeithas Cyfarwyddwyr Gwasanaethau Cymdeithasol Cymru sy’n cynrychioli ac yn cefnogi cyfarwyddwyr ac uwch-reolwyr sy’n gweithio ym maes gwasanaethau cymdeithasol yng Nghymru. Mae wedi ymrwymo i sicrhau bod llais y gwasanaeth gofal cymdeithasol yn cael ei glywed wrth lunio polisïau. Mae’n darparu hyfforddiant, gwybodaeth, a chyfleoedd i rwydweithio. Mae ei chylchlythyr yn canolbwyntio ar y datblygiadau a’r wybodaeth ddiweddaraf am waith a wneir gan yr arweinwyr yng ngwasanaethau cymdeithasol Cymru.
Comisiwn Bevan yw melin drafod iechyd a gofal fwyaf blaenllaw Cymru. Mae’n herio, yn newid ac yn hyrwyddo meddwl ac ymarfer i sicrhau iechyd a gofal cynaliadwy sy’n barod at y dyfodol. Mae ei gylchlythyr yn cynnwys diweddariadau ar draws ei raglenni gwaith amrywiol.
Mae Iechyd a Gofal Digidol Cymru yn meithrin y genhedlaeth nesaf o wasanaethau sydd eu hangen i drawsnewid y ddarpariaeth iechyd a gofal yng Nghymru. Mae eu cylchlythyr yn darparu’r diweddariadau digidol diweddaraf gan GIG Cymru yn syth i’ch blwch derbyn.
Mae rhaglen Ecosystem Iechyd Digidol Cymru yn dod â diwydiant, clinigwyr, llunwyr polisïau, academyddion, arloeswyr a chyllidwyr at ei gilydd i greu ecosystem fywiog o arloesedd digidol o fewn y system iechyd a gofal cymdeithasol yng Nghymru. Mae’n rhan o gylchlythyr Hwb Gwyddorau Bywyd Cymru, sy’n cynnwys yr wybodaeth ddiweddaraf am ei phrosiectau, ei digwyddiadau a’i chyfleoedd.
Mae Ymchwil Iechyd a Gofal Cymru yn dod â phartneriaid at ei gilydd o GIG Cymru, awdurdodau lleol, sefydliadau ymchwil, y trydydd sector ac eraill. Maent yn gweithio gyda’i gilydd i ymchwilio i glefydau, triniaethau, gwasanaethau a chanlyniadau sy’n gallu arwain at ddarganfyddiadau a datblygiadau arloesol. Mae eu bwletin wythnosol yn cynnwys newyddion, digwyddiadau, hyfforddiant, cyllid a swyddi gwag ym maes ymchwil iechyd a gofal cymdeithasol.
Mae Technoleg Iechyd Cymru yn sefydliad cenedlaethol sydd â’r nod o optimeiddio’r gwaith o wella iechyd y genedl drwy werthuso effeithiolrwydd technolegau iechyd, rhoi arweiniad ar weithredu, a chefnogi datblygiad polisïau. Mae’r cylchlythyr yn cynnwys gwybodaeth am bolisi a chanllawiau newydd.
Partneriaeth rhwng Llywodraeth Cymru, GIG Cymru a sefydliadau eraill yw Gwelliant Cymru, a’u cenhadaeth yw cefnogi datblygiad gwasanaethau iechyd a gofal yng Nghymru. Mae’r cylchlythyr yn rhoi’r wybodaeth ddiweddaraf yn uniongyrchol am eu gwaith parhaus.
Mae Hwb Gwyddorau Bywyd Cymru yn gorff hyd braich o Lywodraeth Cymru i ysgogi arloesi a chydweithio rhwng y meysydd diwydiant, iechyd, gofal cymdeithasol ac academia. Ei nod yw gwneud gwahaniaeth cadarnhaol i bobl, teuluoedd a busnesau ar hyd a lled y wlad, a sicrhau bod Cymru ar flaen y gad o ran arloesi ym maes iechyd, gofal a lles. Mae’r cylchlythyr yn cynnig y newyddion diweddaraf am arloesi, a’r digwyddiadau a’r cyhoeddiadau diweddaraf ar draws y maes iechyd a gofal cymdeithasol yng Nghymru a thu hwnt.
MediWales yw’r rhwydwaith gwyddorau bywyd annibynnol ar gyfer Cymru. Mae’n dod â diwydiant, academia a’r gymuned glinigol at ei gilydd i gefnogi datblygiad y gwyddor bywyd dynol yng Nghymru ac i greu cyfleoedd busnes a chydweithio ar gyfer ei aelodau. Mae eu cylchlythyr misol yn cynnwys digwyddiadau sydd ar y gweill, cyfleoedd cyllido, newyddion am y diwydiant, a mwy.
Mae Moondance Cancer Initiative yn canfod, yn ariannu ac yn ysgogi pobl arbennig a syniadau dewr i wneud Cymru’n arweinydd byd-eang ym maes goroesi canser. Ei nod yw cyflymu gwelliant sylweddol a pharhaus mewn canlyniadau goroesi canser dros y 10 i 15 mlynedd nesaf. Maent yn sefydliad nid-er-elw sy’n ariannu gwaith arloesi a gweithredu byw mewn lleoliadau clinigol a all gael effaith ar unwaith ar ganlyniadau goroesi canser i gleifion yng Nghymru.
Cynhelir y Rhwydwaith gan Iechyd Cyhoeddus Cymru a’i nod yw hysbysu, hwyluso a chreu cysylltiadau ar gyfer y rheini sy’n gweithio yn y sectorau cyhoeddus a phreifat a'r trydydd sector er mwyn gwella iechyd a llesiant y boblogaeth yng Nghymru. Mae ei e-fwletinau yn canolbwyntio ar bwnc gwahanol bob mis, gan gynnwys llesiant meddyliol, maetheg, ac anghydraddoldebau iechyd.
Mae Iechyd Cyhoeddus Cymru yn gweithio i ddiogelu a gwella iechyd a llesiant, a lleihau anghydraddoldebau iechyd ar gyfer pobl Cymru. Mae’r e-fwletin misol yn cynnwys manylion eu holl newyddion a chyhoeddiadau diweddaraf.
Gofal Cymdeithasol Cymru yw’r corff rheoleiddio cenedlaethol sy’n gyfrifol am reoleiddio gweithlu gofal cymdeithasol Cymru. Maen nhw’n gosod y safon ar gyfer cymwysterau a hyfforddiant, yn cynnal cofrestr o weithwyr gofal cymdeithasol, yn darparu canllaw i ddarparwyr gofal cymdeithasol, a mwy. Tanysgrifiwch i’r cylchlythyr i gael yr wybodaeth ddiweddaraf am ddatblygiadau newydd a digwyddiadau sydd ar y gweill.
Rhwydwaith o weithwyr iechyd a chelfyddydau proffesiynol ledled Cymru yw Rhwydwaith Iechyd a Llesiant Celfyddydau Cymru. Mae’n rhwydwaith rhad ac am ddim sy’n agored i unrhyw un sy’n gweithio ym maes y celfyddydau, iechyd a llesiant, neu sydd â diddordeb yn hynny. Bydd ei gylchlythyr yn rhoi’r wybodaeth ddiweddaraf i chi am ddatblygiadau ym maes y Celfyddydau ac Iechyd, erthyglau banc gwybodaeth newydd, cyllid, cyfleoedd gwaith, digwyddiadau a datblygiadau yn y sector.
Mae’r Rhwydwaith Gwyddor Gofal Iechyd Academaidd (AHSN) yn rhwydwaith cydweithredol o 15 o bartneriaethau rhanbarthol rhwng y GIG, prifysgolion, a phartneriaethau’r diwydiant. Maen nhw’n dod â rhanddeiliaid allweddol at ei gilydd i gyd-lunio a chyd-gyflawni atebion i’r gyfer yr heriau mwyaf sy’n wynebu’r GIG ym maes iechyd, i gefnogi’r arferion gorau sy’n seiliedig ar dystiolaeth, ac i hwyluso defnydd technolegau a thriniaethau arloesol. Mae eu cylchlythyr yn rhoi crynodeb o’r newyddion arloesi, digwyddiadau, cyhoeddiadau a’r safbwyntiau diweddaraf gan y 15 Rhwydwaith Gwyddor Gofal Iechyd Academaidd.
Mae’r Comisiwn Ansawdd Gofal yn rheoleiddiwr ar wasanaethau iechyd a gofal cymdeithasol yn Lloegr. Mae’n gwneud yn siŵr bod pobl yn cael gofal diogel ac effeithiol, ac yn annog gwasanaethau gofal i wella. Mae’r Comisiwn Ansawdd Gofal hefyd yn cyhoeddi adroddiadau a gwybodaeth ar faterion ansawdd mawr ym maes iechyd a gofal cymdeithasol. Mae ei gylchlythyr yn ymdrin â’r wybodaeth ddiweddaraf sy’n gysylltiedig â’i waith, yn ogystal â’r wybodaeth hanfodol ddiweddaraf am ofal cymdeithasol.
Mae Deloitte UK yn gwmni gwasanaethau proffesiynol blaenllaw – un o’r mwyaf yn y DU. Mae eu cylchlythyr yn rhoi golwg bersonol ar faterion amserol sy’n effeithio ar y sector Gofal Iechyd a Gwyddorau Bywyd a weithredir gan Ganolfan Deloitte ar gyfer Atebion Iechyd yn y DU.
Mae'r Adran Iechyd a Gofal Cymdeithasol yn cefnogi gweinidogion i arwain iechyd a gofal cymdeithasol y genedl er mwyn helpu pobl i fyw bywydau iachach a mwy annibynnol am gyfnodau hirach. Mae ei chylchlythyr yn cynnwys cyfoeth o bynciau iechyd gan gynnwys iechyd meddwl, diogelwch cleifion, gofal ysbyty, a gofal cymdeithasol.
Mae EDIS yn glymblaid o sefydliadau sy’n gweithio i wella cydraddoldeb, amrywiaeth a chynhwysiant o fewn y sector ymchwil gwyddoniaeth ac iechyd.
Mae’r Sefydliad Iechyd yn fudiad elusennol annibynnol sy’n gweithio i ddatblygu’r DU i fod yn iachach. Mae ei gylchlythyr misol yn cynnwys gwahanol safbwyntiau a barn arbenigol ar wahanol bynciau iechyd neu ofal iechyd, yn ogystal â manylion cyfleoedd cyllido a’i gyhoeddiadau diweddaraf.
Mae The King’s Fund yn felin drafod ac elusen iechyd sydd â’r nod o wella iechyd a gofal drwy ymchwil, addysg, hyfforddiant, adrodd ar faterion allweddol iechyd a gofal cymdeithasol, a thrwy ddylanwadu ar bolisïau. Maen nhw’n cynnig amrywiaeth o gylchlythyrau sy’n amrywio o ran pa mor aml y maent yn ymddangos, ac sy’n gwella meysydd allweddol eu gwaith. Mae’r cylchlythyrau hyn yn cynnwys digwyddiadau, y newyddion diweddaraf, a’r datblygiadau diweddaraf ym meysydd iechyd digidol a thechnoleg.
Mae Med-Tech Innovation News yn ymdrin â’r datblygiadau diweddaraf yn y sector technoleg feddygol. Maen nhw’n darparu newyddion, dadansoddiad, barn, a chynnwys arall sy’n ymwneud â dyfeisiau meddygol, iechyd digidol, a thechnoleg gofal iechyd. Mae’r cylchlythyr yn adnodd allweddol i weithwyr proffesiynol ym maes gofal iechyd, i arweinwyr diwydiant, ac i fuddsoddwyr gael y wybodaeth ddiweddaraf am y datblygiadau diweddaraf yn y maes.
Mae’r Sefydliad Cenedlaethol dros Ragoriaeth mewn Iechyd a Gofal yn darparu canllawiau a chyngor cenedlaethol i wella iechyd a gofal cymdeithasol. Mae ganddo amrywiaeth o gylchlythyrau gwahanol ar gael i danysgrifio iddynt, gan gynnwys rhai ar iechyd a gofal cymdeithasol, gwyddorau bywyd a gofal sylfaenol. Mae’r cylchlythyrau hyn yn cynnwys ei ganllawiau diweddaraf, newyddion, digwyddiadau sydd ar y gweill, a mwy.
Mae cronfa’r Sefydliad Cenedlaethol dros Ymchwil Iechyd a Gofal yn galluogi ac yn cyflawni ymchwil iechyd a gofal cymdeithasol o’r radd flaenaf sy’n gwella iechyd a llesiant pobl, ac mae’n hyrwyddo twf economaidd. Mae’n cynnig sawl bwletin sy’n canolbwyntio ar wahanol feysydd o’i waith.
Mae Ymddiriedolaeth Nuffield yn felin drafod iechyd annibynnol. Ei nod yw gwella ansawdd gofal iechyd yn y DU drwy ddarparu ymchwil sy’n seiliedig ar dystiolaeth, dadansoddi polisïau a chychwyn a llywio trafodaeth.
Mae ECHAlliance yn Gwmni Buddiannau Cymunedol sy’n rhoi manteision i gymunedau mewn 80+ o Ecosystemau rhyngwladol drwy’r byd.
Mae’n dod â’i chymuned fyd-eang at ei gilydd drwy rwydwaith o ecosystemau sy’n cynnig atebion i anghenion, chwalu seilos, trawsnewid gofal iechyd, trosglwyddo arferion gorau a gwersi a ddysgwyd a chreu cyfleoedd economaidd.
Mae’r EFB yn ffederasiwn di-wneud-elw o gymdeithasau biodechnoleg a dysgedig, prifysgolion, sefydliadau gwyddonol, cwmnïau biodechnoleg a biodechnolegwyr unigol sy’n gweithio i hyrwyddo ymchwil biodechnoleg ac arloesi yn y gwyddorau bywyd.
Mae’r Ffederasiwn Ewropeaidd o Ddiwydiannau a Chymdeithasau Fferyllol (EFPIA) yn cynrychioli’r diwydiant biofferyllol yn Ewrop. Cenhadaeth yr EFPIA yw creu amgylchedd cydweithredol sy’n cynorthwyo ei aelodau i arloesi, darganfod, datblygu a darparu therapïau a brechlynnau newydd i bobl ar draws Ewrop, yn ogystal â chyfrannu i economi Ewrop.
Mae Cymdeithas Rheoli Iechyd Ewrop (EHMA) yn gorff aelodaeth di-wneud-elw sy’n canolbwyntio ar gapasiti a dulliau rheoli iechyd gyda’r nod o gynorthwyo i weithredu polisi ac arferion iechyd yn llwyddiannus.
Mae’r EHMA yn dod â rheolwyr iechyd ac ysbyty, gweithwyr gofal iechyd, ymchwilwyr, addysgwyr, academia, gwneuthurwyr polisi a phenderfyniadau, a rhanddeiliaid, at ei gilydd ar lefel leol, ranbarthol, genedlaethol a rhyngwladol.
Mae Cymdeithas Iechyd Cyhoeddus Ewrop (EUPHA), yn gryno, yn gorff ymbarél ar gyfer cymdeithasau a sefydliadau iechyd cyhoeddus yn Ewrop. Ei nod yw hwyluso a hyrwyddo llais i’r rhwydwaith iechyd cyhoeddus drwy wneud y dystiolaeth yn fwy gweladwy a chryfhau capasiti gweithwyr iechyd cyhoeddus proffesiynol.
Nod MedTech Europe yw sicrhau bod technoleg feddygol arloesol ar gael i fwy o bobl a helpu systemau gofal iechyd i symud tuag at lwybr cynaliadwy. Mae’n annog polisïau sy’n helpu’r diwydiant technoleg feddygol i gwrdd ag anghenion a disgwyliadau gofal iechyd cynyddol Ewrop. Mae hefyd yn hyrwyddo gwerth technoleg feddygol i Ewrop gan roi pwyslais ar arloesi a chysylltiadau rhwng rhanddeilaid, defnyddio ymchwil a data economaidd, cyfathrebu, digwyddiadau gan y diwydiant a sesiynau hyfforddiant.
Nod y Gynghrair Therapiwtig Ddigidol (DTA) yw trawsnewid gofal iechyd y byd drwy ddatblygu triniaethau therapiwtig i wella canlyniadau economaidd clinigol ac iechyd. Ei hamcan yw ehangu dealltwriaeth, integreiddio a’r defnydd o driniaethau therapiwtig digidol wedi eu gwerthuso’n glinigol ar gyfer cleifion, clinigwyr a gwneuthurwyr polisi drwy addysg, eiriolaeth a chydweithrediad ar draws y diwydiant.
Nod y Gymdeithas Systemau Gwybodaeth a Rheoli Gofal Iechyd (HIMSS) yw diwygio’r ecosystem iechyd fyd-eang drwy rym gwybodaeth a thechnoleg drwy gysylltu pobl ar draws yr ecosystem iechyd a chreu cymuned i gydweithrediad ac arloesi gael ffynnu.
Mae’r Gymdeithas Peirianneg Fferyllol Ryngwladol (ISPE) yn gymdeithas ddi-wneud-elw sy’n arwain ar ddatblygiadau gwyddonol, technegol a rheoleiddiol drwy’r cylch bywyd fferyllol. Mae ISPE yn cysylltu gwybodaeth fferyllol i ddarparu arloesi mewn gweithgynhyrchu a’r gadwyn gyflenwi, a dealltwriaeth o reoleiddio, er mwyn gwella ymdrechion y diwydiant i ddatblygu, gweithgynhyrchu a darparu meddyginiaethau o ansawdd yn ddibynadwy i gleifion.
Oes gennych chi ddiddordeb mewn rhestru eich cylchlythyr eich hun yma? Cysylltwch drwy helo@hwbgbcymru.com.
