Byrddau Iechyd Prifysgol Bae Abertawe a Hywel Dda yn Archwilio Cyfleoedd Deallusrwydd Artiffisial Newydd mewn Optimeiddio Llwybrau Llawfeddygol Dewisol

Ar y cyd ag OPCI, partner yn y diwydiant, mae'r cynllun peilot yn cynrychioli dechrau taith gyffrous tuag at fodel mwy deallus, teg a chynaliadwy o ddarparu gofal iechyd, gan roi De-orllewin Cymru ar flaen y gad o ran archwilio ailgynllunio llwybrau sydd wedi'u galluogi'n ddigidol yn GIG Cymru. 

Partneriaid a chyllid 

• Bwrdd Iechyd Prifysgol Bae Abertawe
• Bwrdd Iechyd Prifysgol Hywel Dda
• OPCI LTD
• Llywodraeth Cymru 

Nodau’r project

Mae'r prosiect hwn yn cynrychioli cydweithrediad rhwng Bwrdd Iechyd Prifysgol Bae Abertawe, Bwrdd Iechyd Prifysgol Hywel Dda, ac OPCI, gan weithio gyda'i gilydd i archwilio ffyrdd newydd o gryfhau llwybrau gofal llawfeddygol dewisol. 

Y nod yw dangos ymrwymiad y ddau Fwrdd Iechyd i wella gofal i bobl Cymru yn barhaus, hyd yn oed yng nghanol y pwysau sylweddol sydd ar wasanaethau a gofynion cymhleth y system. Mae'n canolbwyntio ar sut mae timau rheng flaen y GIG yn arwain trawsnewid mewn ffordd sy'n seiliedig ar werthoedd, sy'n canolbwyntio ar y claf, ac sy'n cyd-fynd ag anghenion gwasanaethau lleol ac uchelgeisiau strategol cenedlaethol. 

Er bod y cynllun peilot yn cynnwys defnyddio OpenPredictor, adnodd deallusrwydd artiffisial a ddarperir gan OPCI, partner yn y DU, mae'r astudiaeth achos hon yn cael ei harwain yn fwriadol iawn gan iechyd, nid gan gynnyrch. Mae'r dechnoleg yn cael ei chyflwyno fel elfen gefnogol yn y naratif ehangach, a'r prif nodau o hyd yw arweinyddiaeth, arloesedd a gweledigaeth a ddangosir gan dimau GIG Cymru. 

Heriau a Chyfleoedd 

Fel llawer o sefydliadau'r GIG, mae Byrddau Iechyd Prifysgol Bae Abertawe a Hywel Dda yn wynebu heriau sylweddol: cynnydd mewn ôl-groniadau o driniaethau dewisol, capasiti cyfyngedig, a'r rheidrwydd i amddiffyn diogelwch cleifion ar yr un pryd â sicrhau mynediad teg ac amserol at ofal.  Gall iechyd cleifion ddirywio wrth aros, gan gynyddu'r risg wrth gael llawdriniaeth a'r tebygolrwydd o orfod canslo, yn enwedig mewn gwasanaethau mawr fel orthopaedeg. 

Roedd y ddau Fwrdd Iechyd yn cydnabod, er eu bod yn cynnal yr egwyddor bwysig o drin cleifion yn nhrefn dyddiadau lle bynnag y bo hynny'n glinigol briodol, bod angen gwella sut mae rhestrau aros llawfeddygol yn cael eu rheoli, drwy ystyried iechyd cleifion a’r risg glinigol. Gyda'i gilydd, gwelsant gyfle i archwilio dulliau newydd a allai gryfhau diogelwch cleifion, cefnogi ymyrraeth gynnar lle bo hynny'n briodol, a sicrhau bod gwasanaethau'n parhau i fod yn deg, yn ymatebol ac wedi'u personoli i anghenion cleifion unigol. 

Cynhaliodd clinigwyr ac arweinwyr gweithredol o Fyrddau Iechyd Bae Abertawe a Hywel Dda gynllun peilot ar y cyd ar OpenPredictor, a gynlluniwyd i archwilio sut gallai haenu sy'n cael ei yrru gan ddeallusrwydd artiffisial gefnogi gwell rheolaeth ar lwybrau dewisol. 

Yn bwysig, cafodd y cynllun peilot ei lunio a'i lywodraethu gan dimau'r GIG eu hunain, gan sicrhau bod y dechnoleg yn cael ei defnyddio'n feddylgar i ategu barn glinigol broffesiynol, nid ei newid. 

Canolbwyntiodd y cynllun peilot ar y canlynol: 

• Archwilio'r gwaith rhagweithiol o ganfod cleifion risg uchel ar gyfer optimeiddio wedi'i dargedu neu adolygiad arbenigol
• Deall sut y gellid blaenoriaethu cleifion risg is yn ddiogel ar gyfer triniaeth gynharach mewn unedau trwybwn uchel neu lai cymhleth (High Volume Low Complexity)
• Gwerthuso dulliau deinamig o reoli rhestrau aros o fewn fframweithiau llywodraethu
• Profi i ganfod dirywiadau nad ydynt yn amlwg er mwyn gwella tegwch iechyd
• Cryfhau'r broses o wneud penderfyniadau ar y cyd rhwng clinigwyr a chleifion drwy well dealltwriaeth o risg a chanlyniadau 

Canlyniadau'r Prosiect 

Mae canfyddiadau a mewnwelediadau cychwynnol y cynllun peilot yn awgrymu bod cryn gyfle i gefnogi gofal mwy diogel, mwy effeithlon, sy'n canolbwyntio ar y claf: 

• Mae llwyddo i ganfon dirywiad cynnar cleifion yn rhoi cyfleoedd i ymyrryd yn amserol neu addasu cynlluniau triniaeth
• Tynnwyd sylw at gleifion risg is ar gyfer llwybrau symlach posibl, gan leihau oedi a chadw safonau llawfeddygol
• Roedd trosolwg byw o risgiau clinigol yn cryfhau trafodaethau'r tîm amlddisgyblaethol a rheoli rhestrau aros
• Mae gwneud penderfyniadau gwell ar y cyd yn cefnogi sgyrsiau mwy tryloyw gyda chleifion am risgiau a manteision parhau â llawdriniaethau 

Mae'r mewnwelediadau cynnar hyn yn dangos sut y gall arloesedd digidol cyfrifol, sy'n cael ei yrru gan arweinyddiaeth glinigol, helpu i fynd i'r afael â rhai o'r heriau mwyaf dybryd ym maes gofal dewisol. 

Sbarduno Arloesedd: Timau wedi ymrwymo i Ofal Gwell  

Mae llwyddiant y cynllun peilot hwn yn adlewyrchu’r diwylliant rhagorol o arweinyddiaeth, cydweithio a gwelliant parhaus ym Myrddau Iechyd Prifysgol Bae Abertawe a Hywel Dda. Dangosodd timau clinigol, rheolwyr gweithredol, dadansoddwyr a staff cefnogi ar draws y ddau sefydliad ymrwymiad rhyfeddol i gydbwyso arloesedd â phwysau parhaus i ddarparu gwasanaethau. 

Mae eu penderfyniad ar y cyd i archwilio cyfleoedd ar gyfer gofal mwy diogel, teg a mwy effeithlon, er gwaethaf heriau gweithredol, yn dangos yr arweinyddiaeth sy'n seiliedig ar werthoedd sydd wrth galon GIG Cymru. 

Partneriaeth a Gweledigaeth Genedlaethol 

Mae'r prosiect hwn yn enghraifft bwerus o'r hyn y gellir ei gyflawni drwy bartneriaeth wirioneddol rhwng y GIG a diwydiant, yn seiliedig ar arweinyddiaeth leol, trylwyredd clinigol, a gwerthoedd cyffredin. 

Rhaid cydnabod gweledigaeth Llywodraeth Cymru o ran cefnogi arloesedd digidol a thrawsnewid iechyd sy'n cael ei arwain gan ddata hefyd. Mae eu hymrwymiad i adferiad dewisol a gwella gwasanaethau'n gynaliadwy wedi creu'r amgylchedd lle gall cynlluniau peilot fel hyn ffynnu. 

Yn fwy na dim, mae'r gwaith hwn yn atgyfnerthu bod yn rhaid i arloesedd yn y GIG bob amser ymwneud â gwella gofal cleifion, nid technoleg er ei mwyn ei hun, ond technoleg fel adnodd ar gyfer gofal iechyd gwell a mwy diogel, wedi'i hategu gan oruchwyliaeth glinigol i sicrhau nad yw byth yn cael ei ddefnyddio ar ei ben ei hun. 

Dywedodd yr Athro Mike Reed, Sylfaenydd OPCI a Llawfeddyg Orthopaedig Ymgynghorol:  

“Mae'r ymgysylltu clinigol gan Fae Abertawe a Hywel Dda wedi bod yn rhagorol. Aeth eu timau ati i gynnal y cynllun peilot hwn gyda phwrpas clir, chwilfrydedd ac ymdeimlad dwfn o gyfrifoldeb tuag at ein cleifion. Mae wedi bod yn fraint cyfrannu o safbwynt ymchwil ac arloesi clinigol, a chefnogi'r Byrddau Iechyd wrth iddynt archwilio sut y gallai offer digidol ategu barn broffesiynol. Mae hon wedi bod yn ymdrech wirioneddol gydweithredol, wedi'i seilio ar ddysgu ar y cyd a pharch at ein gilydd."  

Dywedodd Dr Justin Green, Sylfaenydd OPCI a Llawfeddyg Orthopaedig:  

“Mae hi wedi bod yn fraint gweithio ochr yn ochr â'r timau ym Myrddau Iechyd Prifysgol Bae Abertawe a Hywel Dda. Mae eu natur agored, eu harweinyddiaeth a'u hymrwymiad i ddefnyddio technoleg i gefnogi'r gwaith o wella gwasanaethau wedi siapio'r prosiect hwn o'r cychwyn cyntaf. Mae cleifion a blaenoriaethau clinigol wedi aros yn ganolog drwy gydol y broses. Rydym ni wedi gwerthfawrogi'n fawr y cydweithio a'r ysbryd cyffredin o arloesi ar draws y Byrddau Iechyd a'r Llywodraeth, sy'n enghraifft gref o sut gall gofal iechyd a thechnoleg weithio gyda'i gilydd yn barchus i archwilio dulliau newydd o ymdrin â gofal." 

Y camau nesaf  

Mae Byrddau Iechyd Prifysgol Bae Abertawe a Hywel Dda bellach yn ystyried y ffordd orau o adeiladu ar yr wybodaeth a gafwyd o'r cynllun peilot mewn gwasanaethau orthopaedig. Mae'r ffocws cyntaf ar werthuso'r posibilrwydd o fabwysiadu'r dull hwn ar draws llawdriniaethau orthopaedig cymalau newydd, gan mai dyma'r maes sy'n dod o dan drwydded reoleiddio OpenPredictor ar hyn o bryd. Mae sicrhau bod yr adnodd yn cael ei wreiddio'n ddiogel ac yn effeithiol i lwybrau llawdriniaethau cymalau orthopaedig newydd yn gam cyntaf angenrheidiol.  

Mae'r dechnoleg yn gallu cefnogi arbenigeddau llawfeddygol eraill, a'r bwriad hirdymor, gan weithio'n agos gyda'r Byrddau Iechyd, yw dilysu a datblygu ei defnydd yn ehangach fel rhan o ddull ehangach, sy'n cael ei lywodraethu'n glinigol, o drawsnewid llwybrau llawfeddygol. 

Mae'r cynllun peilot hefyd yn cyfrannu at fyfyrdodau ar sut gallai haenu risgiau digidol gefnogi strategaethau cenedlaethol ar gyfer adferiad dewisol, trawsnewid gwasanaethau, a thegwch iechyd yng Nghymru. Drwy ddysgu o'r cynllun peilot ac ystyried y buddsoddiad a wnaed, mae'r Byrddau Iechyd yn helpu i lywio syniadau yn y dyfodol am y potensial ar gyfer arloesi digidol ehangach ar draws GIG Cymru. 

Mae Bae Abertawe a Hywel Dda yn dangos bod cyfle go iawn, gyda'r arweinyddiaeth, yr ymgysylltu clinigol a'r bartneriaeth iawn, i lunio dyfodol mwy clyfar a theg ar gyfer gwasanaethau gofal wedi'u cynllunio ledled Cymru. Ewch i https://bipba.gig.cymru/ / https://biphdd.gig.cymru/  i gael rhagor o wybodaeth.