Cryfhau ein harweinyddiaeth: Croesawu Dr Meinir Jones i’n Bwrdd Cyfarwyddwyr

Rydym yn falch o gyhoeddi bod Dr Meinir Jones wedi ymuno â’n Bwrdd Cyfarwyddwyr, yn dilyn proses penodiadau cyhoeddus a gwblhawyd ym mis Mehefin 2024, ac a gymeradwywyd gan Ysgrifennydd y Cabinet dros Iechyd a Gofal Cymdeithasol.

Mae penodiad Dr Meinir Jones yn welliant sylweddol yng ngallu Hwb Gwyddorau Bywyd Cymru i sbarduno arloesedd a rhagoriaeth ym maes gofal iechyd. Mae Meinir yn feddyg teulu sy’n siarad Cymraeg o Abertawe, ac mae hi’n meddu ar fwy na 25 mlynedd o brofiad clinigol ar draws y system. Mae ei gyrfa fyd-eang yn cynnwys bron i bum mlynedd yn Awstralia, pedair blynedd mewn arferion gwledig ac o bell yng Ngweriniaeth Iwerddon, a nifer o swyddi uwch ledled y DU. Mae ei thaith drawiadol yn cynnwys cyfraniadau sylweddol at drawma a meddygaeth frys, meddygaeth cyhyrysgerbydol a chwaraeon, a dulliau gofal iechyd seiliedig ar werth.

Mae Meinir yn arweinydd tosturiol a thrawsnewidiol, ac mae hi’n dod â gweledigaeth ac uchelgais strategol a chwilfrydedd cyson i archwilio dulliau arloesol a newydd o ddarparu iechyd a gofal sy’n bodloni pwysau presennol a rhagamcanol ein systemau. 

Dyma rai o’i chyflawniadau nodedig:

• Arwain y gwaith o ddylunio a darparu’r Uned Mân Anafiadau dan arweiniad meddygon teulu yn Ysbyty’r Tywysog Philip, Llanelli.
• Datblygu rhaglenni addysg Gofal Iechyd Seiliedig ar Werth.
• Arwain y gwaith o baratoi ysbytai maes COVID-19 yng ngorllewin Cymru, gan sicrhau safonau uchel o ofal i bob claf.
• Cyd-arwain y Rhwydwaith Clinigol Cyhyrysgerbydol, a arweiniodd at Gynhadledd Genedlaethol Cyflyrau Cyhyrysgerbydol (MSK) gyntaf Cymru a datblygu Datganiad Ansawdd MSK.

Mae Meinir hefyd wedi bod yn Gyfarwyddwr Meddygol Cyswllt ar gyfer Gofal Iechyd Seiliedig ar Werth a Thrawsnewid ym Mwrdd Iechyd Prifysgol Hywel Dda ers 2017. Roedd ei dull arloesol, yn enwedig creu ‘Teulu Jones’ – sef menter teulu rhithffurf – yn chwarae rhan allweddol yn natblygiad Strategaeth Glinigol Iachach Canolbarth a Gorllewin Cymru yn ôl yn 2018. Wrth ddefnyddio’r fenter Teulu Jones, roedd hyn yn helpu i newid y sgwrs yn ymwneud ag ymgysylltu â’r cyhoedd a staff drwy ganolbwyntio ar bobl, teuluoedd a chymunedau, ac nid ar ysbytai a gwasanaethau yn unig.

Yn ei swydd bresennol fel Cyfarwyddwr Clinigol Cenedlaethol [Dros Dro] o fewn Gweithrediaeth newydd y GIG, mae Meinir yn darparu dull ‘y cyntaf ymysg cydraddolion’ (primus inter pares) o ran arweinyddiaeth glinigol ar draws Gweithrediaeth y GIG. Mae hi hefyd yn goruchwylio 11 o Rwydweithiau Clinigol Strategol Cenedlaethol newydd, gan ei lleoli’n ddi-dor i ddod â gwybodaeth a strategaethau arloesol i Hwb Gwyddorau Bywyd Cymru. 

Dywedodd Dr Meinir Jones, Cyfarwyddwr Anweithredol, Hwb Gwyddorau Bywyd Cymru:

“Rydw i wrth fy modd o fod wedi ymuno â Hwb Gwyddorau Bywyd Cymru ac yn cydweithio â phartneriaid allweddol ar draws y sectorau iechyd a gofal. Rydw i’n edrych ymlaen at gryfhau ein cysylltiadau â’r diwydiant a meithrin dulliau arloesol o gefnogi a grymuso gofal pobl Cymru. Rydw i’n credu y gall ein hymdrechion cydweithredol helpu i sbarduno datblygiadau sylweddol ym maes gofal iechyd” 

Cafodd Dr Meinir Jones ei chroesawu gan Cari-Anne Cuinn, Prif Swyddog Gweithredol Hwb Gwyddorau Bywyd Cymru, gan ddweud:

“Rydym yn falch iawn bod Meinir wedi ymuno â’n bwrdd. Bydd ei harbenigedd clinigol helaeth a’i harweinyddiaeth arloesol – yn rhyngwladol ac yn y DU – yn dod â phersbectif amhrisiadwy a fydd o fudd mawr i’n sefydliad a’r sectorau iechyd a gofal cymdeithasol ehangach. Bydd gweledigaeth strategol Meinir yn gwella ein hymdrechion i ddarparu gofal o ansawdd uchel, i ddarparu’r gwasanaeth gorau posibl ac i feithrin twf economaidd.”

Gyda Dr Meinir Jones ar y Bwrdd, rydym yn awyddus i gryfhau ein harweinyddiaeth o ran arloesi ym maes gofal iechyd, gan ddefnyddio profiad helaeth a gweledigaeth strategol Meinir i greu dyfodol iachach i bobl Cymru.

Mae rhagor o wybodaeth am Hwb Gwyddorau Bywyd Cymru a’n mentrau ar gael yma: Ein blaenoriaethau.