Trosolwg

Mae rheoli clwyfau yn her sylweddol yn system gofal iechyd y DU. Yn 2017/2018 yn unig, rheolodd y GIG tua 3.8 miliwn o gleifion â chlwyfau, gan roi pwysau difrifol ar y defnydd o adnoddau. Gwnaeth nyrsys ardal / cymunedol 54.4 miliwn o ymweliadau yn ystod y flwyddyn, tra gwnaeth cynorthwywyr gofal iechyd 53.6 miliwn o ymweliadau a gwnaeth nyrsys practis 28.1 miliwn o ymweliadau. Mae rheoli clwyfau’n costio £8.3 biliwn i'r GIG bob blwyddyn, gyda £2.7 biliwn yn cael ei ddyrannu i reoli clwyfau sydd wedi gwella, a £5.6 biliwn wedi’i ddyrannu ar gyfer clwyfau sydd heb wella. Yn benodol, roedd y gymuned yn cyfrif am 81% o gyfanswm y gost flynyddol. Yng Nghymru, amcangyfrifodd cyhoeddiad Canolfan Arloesedd Clwyfau Cymru yn 2017 bod cost flynyddol trin clwyfau yn £330 miliwn, sef 6% o gyllideb flynyddol y GIG.

Mae’r galw cynyddol hwn am ofal clwyfau yn galw am strategaethau rheoli effeithiol. Mae asesu amserol a manwl gywir, dewis triniaeth briodol, a monitro ac ailasesu cyson yn chwarae rhan allweddol wrth hwyluso’r broses o wella clwyfau’n gyflym ac yn effeithlon. Mae gofal mor fanwl gywir yn lleihau’r risg o gymhlethdodau, yn lleihau’r angen am ymyriadau pellach, ac yn lliniaru cyfnodau hir yn yr ysbyty, gan leihau’r straen ar adnoddau gofal iechyd.

Ar ben hynny, y tu hwnt i leddfu’r baich gofal iechyd, mae rheoli clwyfau’n effeithiol yn gwella canlyniadau cleifion yn sylweddol. Mae gofal clwyfau priodol nid yn unig yn cyflymu’r broses wella ond hefyd yn lleddfu anghysur a phoen i gleifion, yn enwedig y rhai sy’n ymdopi â chlwyfau cronig. Mae’r gwelliant hwn yng nghyflwr cleifion yn meithrin mwy o ymgysylltiad â gweithgareddau bob dydd ac yn cryfhau eu gallu i fyw’n annibynnol.

Mae cydnabod effaith sylweddol clwyfau ar systemau gofal iechyd a lles cleifion yn tanlinellu’r brys am strategaethau rheoli clwyfau effeithlon sy’n gwneud y gorau o adnoddau, yn gwella profiadau cleifion, ac yn lleihau’r baich cyffredinol ar yr isadeiledd gofal iechyd. 

Cipolwg ar y Farchnad  

Yn ôl gwaith ymchwil gan Allied Market Research, $401.0 miliwn oedd gwerth maint y farchnad dyfeisiau mesur clwyfau digidol byd-eang yn 2020, ac mae’n debygol y bydd y ffigur yn cyrraedd $623.01 miliwn erbyn 2030, gan gofrestru Cyfradd Twf Blynyddol Cyfansawdd (CAGR) o 4.6% rhwng 2021 a 2030.

Mae’r prif gwmnïau yn y farchnad yn cynnwys y canlynol:

Mae Spectral MD, cwmni technoleg feddygol, yn arwain ym maes datrysiadau dadansoddi rhagfynegol sydd wedi’u pweru gan ddeallusrwydd artiffisial (AI) ar gyfer rheoli clwyfau cronig, gyda’i bencadlys yn Dallas, Texas, a chyfleuster yn y DU yn Llundain. Mae prif gynnyrch y cwmni, DeepView, yn ddyfais llaw anymwthiol sy'n defnyddio delweddu aml-sbectrol i werthuso iechyd meinweoedd. Mae'n asesu potensial gwella clwyfau cronig, yn rhagweld risgiau cymhlethdodau, ac yn llywio penderfyniadau triniaeth. Mae DeepView yn cipio delweddau o glwyfau ar wahanol donfeddi golau, ac yn eu dadansoddi gan ddefnyddio algorithm AI i nodi patrymau sy’n gysylltiedig â gwella. Arddangosodd y ddyfais, trwy’r Astudiaeth Glinigol Wlser Traed Diabetig, 86% o gywirdeb diagnosteg, 89% o sensitifrwydd, ac 83% o fanyldeb yn 2022. Enillodd Rheolwr Gyfarwyddwr Spectral MD y Wobr Mediscience Ewropeaidd am Dechnoleg Gorau'r flwyddyn honno, gan roi cydnabyddiaeth i dechnoleg delweddu clwyfau arloesol DeepView.

Mae IslaCare yn datblygu platfform Isla, sy'n galluogi clinigwyr a chleifion i gipio, storio a rhannu delweddau a fideos sy'n gysylltiedig â'u cyflyrau meddygol. Mae’r platfform yn cydymffurfio â chanllawiau’r GIG ar gyfer trosglwyddo delweddau’n ddiogel ac yn caniatáu i glinigwyr olrhain cynnydd cyflwr claf dros amser. Gellir defnyddio Isla ar draws amrywiaeth o arbenigeddau meddygol, gan gynnwys hyfywedd meinwe, podiatreg, strôc, lleferydd ac iaith, therapïau, niwroleg ac iechyd rhywiol. Mae gan yr Adran Ddermatoleg yn Ymddiriedolaeth GIG Ysbytai Brenhinol Cernyw yr angen i allu cipio a gofyn o bell am ffotograffau, fideos a mesurau canlyniadau digidol (PROMS) o ansawdd uchel gan gleifion; sydd wedyn yn cael eu storio’n ddi-dor yn erbyn cofnodion y cleifion, a gellir eu rhannu â thimau clinigol eraill lle bo angen clinigol. Fel rhan o'r symudiad tuag at weithio o bell, mae clinigwyr yn gallu osgoi apwyntiadau wyneb yn wyneb diangen ac awtomeiddio eu llif gwaith i gefnogi monitro parhaus, gan adeiladu set ddata gyfoethog o gyfryngau cleifion sy'n grymuso prosesau gwneud penderfyniadau clinigol rhagweithiol ac amser real.

Mae Mimosa Diagnostics, cwmni technoleg feddygol o Canada, yn arbenigo mewn datblygu a hyrwyddo dyfeisiau delweddu llaw ar gyfer canfod ac atal clefydau cronig yn gynnar. Mae eu prif gynnyrch, MIMOSA Pro, yn ddyfais symudol anymwthiol sy'n defnyddio golau isgoch agos i asesu iechyd meinweoedd. Mae wedi’i gynllunio’n benodol ar gyfer gweithwyr gofal iechyd proffesiynol, ac mae’n helpu i ganfod a monitro clwyfau cronig fel wlserau traed diabetig, briwiau pwyso, ac wlserau gwythiennol yn y coesau. Drwy allyrru golau isgoch agos drwy’r croen, mae MIMOSA Pro yn mesur y golau sy’n cael ei adlewyrchu, gan greu map o ddirlawnder ocsigen y meinwe. Cludadwy a hyblyg, mae’n addas i’w ddefnyddio mewn ysbytai, clinigau a lleoliadau gofal iechyd yn y cartref.

Mae Swift Medical yn gwmni o Toronto sy'n datblygu ac yn marchnata meddalwedd rheoli gofal clwyfau symudol. Mae prif gynnyrch y cwmni, Swift Skin & Wound, yn blatfform meddalwedd cwmwl sy’n galluogi clinigwyr i gasglu, olrhain a rheoli data am glwyfau. Mae Swift Skin & Wound yn cael ei ddefnyddio gan dros 4,000 o gyfleusterau gofal iechyd mewn dros 20 o wledydd. Platfform meddalwedd cwmwl yw Swift Skin & Wound sy’n helpu gweithwyr gofal iechyd proffesiynol i reoli gofal clwyfau. Mae'r platfform yn cynnwys ap symudol sy'n caniatáu i glinigwyr gasglu data am glwyfau yn y man lle y rhoddir gofal, yn ogystal â dangosfwrdd ar y we sy'n rhoi darlun cynhwysfawr i glinigwyr o'u poblogaeth gofal clwyfau.

Mae Healthy.io yn gwmni technoleg iechyd gyda chanolfannau yn Llundain, Boston a Tel Aviv. Mae ‘Minuteful for Wound’ yn system rheoli clwyfau digidol hawdd ei defnyddio, sy’n seiliedig ar ffonau clyfar ac sy’n defnyddio deallusrwydd artiffisial (AI). Mae clinigwyr yn tynnu lluniau o glwyfau gyda’u ffonau clyfar, ac mae’r ap yn defnyddio AI i fesur maint a dyfnder y clwyfau, i nodi heintiau, a dogfennu manylion y clwyfau. Mae'r system yn integreiddio'n ddi-dor â llifiau gwaith clinigol presennol, gan helpu i asesu, olrhain a gwella clwyfau cronig. Mae galluoedd AI Minuteful for Wound yn hwyluso olrhain cynnydd ac adnabod cleifion sydd mewn perygl neu nad ydynt yn ymateb i driniaeth. Gyda chefnogaeth Tystiolaeth yn y Byd Go Iawn (RWE) ac Adroddiad Gwerthuso Pwnc Technoleg Iechyd Cymru (HTW), mae’n hwyluso cyfathrebu effeithiol ymysg cleifion a darparwyr gofal iechyd.

Mae AITIS yn darparu datrysiadau technoleg i asesu risg a alluogir gan AI ar gyfer gwahanol ddiwydiannau. Mae AITIS yn cynnig datrysiadau technoleg gwneud penderfyniadau clinigol a alluogir gan AI. Mae dau ysbyty blaenllaw yn Singapore yn defnyddio AITIS i ddilysu clwyfau. Y nod yw darparu gwell gofal i gleifion clwyfedig a lleihau’r baich economaidd.

Mae Adiuvo Diagnostics Pvt Ltd yn gwmni dyfeisiau diagnostig meddygol o India sy’n arbenigo mewn dyfeisiau gofal iechyd. Mae Illuminate yn ddyfais delweddu uwch-sbectrol cyflym ac anfewnwthiol sy’n cael ei gyrru gan AI, sydd wedi’i dylunio ar gyfer monitro heintiau croen a meinwe meddal yn y man lle y rhoddir gofal. Mae'n canfod pathogenau ar glwyfau yn gyflym o fewn 2 funud, gan ddefnyddio sbectrosgopeg fflwroleuedd aml-donfedd. Mae Illuminate yn olrhain datblygiad clwyfau drwy fesur hyd, lled ac arwynebedd, gan ddefnyddio algorithm AI ar gyfer canfod pathogenau a dosbarthiad tebyg i Gram o facteria a ffyngau. Mae'r ddyfais yn cynhyrchu delweddau wedi’u codio yn ôl lliw mewn adroddiad, sy'n darparu lleoliad gofodol pathogenau ar glwyfau. Mae'r ddyfais wedi’i chysylltu â storfa yn y cwmwl, sy’n caniatáu i ddefnyddwyr gysoni eu data’n ddi-dor.

Mae eKare Inc yn gwmni gofal iechyd Meddalwedd fel Gwasanaeth (SaaS) o’r Unol Daleithiau sy'n arbenigo mewn delweddu, dogfennu a dadansoddi clwyfau. Mae’r system delweddu a dadansoddi clwyfau, Insight 3D, yn cynnig mesuriadau clwyfau 3D cyflym a manwl gywir, gan gynnwys dyfnder a chyfaint, yn y man lle y rhoddir gofal. Mae’r platfform sythweledol a symudol hwn yn defnyddio gweledigaeth gyfrifiadurol, technoleg synhwyro 3D, a deallusrwydd peirianyddol. Mae'r system yn dadansoddi cyfansoddiad meinwe clwyfau drwy ddysgu peirianyddol, yn canfod ac yn amlinellu ffiniau clwyfau yn awtomatig at ddiben mesur cyflym, ac yn darparu trosolwg amser real i hwyluso penderfyniadau gwybodus. Mae’n cydymffurfio â HIPAA, gan sicrhau bod data’n cael ei rannu a’i ddadansoddi’n ddiogel ar blatfform cyffredin, gan symleiddio prosesau rheoli clwyfau.

Mae KroniKare Pte Ltd, sydd wedi'i leoli yng nghanol Singapore, yn wneuthurwr technoleg feddygol. Mae eu Sganiwr Clwyfau KroniKare, dyfais aml-sbectrol gludadwy, yn rhagori mewn mesur clwyfau digidol. Gan ddefnyddio technoleg KroniKare, mae’n darparu asesiadau awtomatig a manwl gywir o glwyfau cronig gydag awgrymiadau rheoli. Mae’r adnodd hwn, sydd wedi’i ddilysu’n glinigol, yn mesur clwyfau tri dimensiwn yn gyflym ac yn dadansoddi’r math o feinweoedd mewn dim ond 30 eiliad, diolch i ddeallusrwydd artiffisial. Mae’n raddadwy iawn, ac mae’n grymuso nyrsys iau, yn monitro amser gwella, ac yn gwella adferiad ar yr un pryd ag atal cymhlethdodau. Mae'r dangosfwrdd integredig, technoleg cwmwl, a'r gweinydd AI yn mesur maint, yn dadansoddi meinweoedd ac yn canfod cymhlethdodau yn awtomatig, ac yn darparu gofal ataliol ar gyfer clwyfau gwastad, crwm, a chylchol, gan ddefnyddio UV, golau gweladwy, a delweddau thermol.  

Mae Advanced Planimetric Services yn cynnig Rhaglen Meddalwedd Planimetreg Digidol PictZar, adnodd mesur clwyfau digidol pwrpasol ar gyfer rheoli gofal clwyfau. Mae’r rhaglen feddalwedd gyfrifiadurol hon yn defnyddio dull digyswllt i fesur a dogfennu cynnydd clwyfau allanol. Mae’n darparu data cynhwysfawr, gan gynnwys Hyd, Lled, Ardal, Cylchedd, Dyfnder wedi’i ychwanegu gan y defnyddiwr, Amcangyfrif o’r Cyfaint, ac mae’n cynnwys ardaloedd pedwar lliw gyda dyfnderoedd cysylltiedig. Mae'r feddalwedd hefyd yn hwyluso trosiadau adnodd gwthio ac yn cynhyrchu graffiau yn seiliedig ar Raddfa Braden y clwyfau. Mae PictZar yn cynnig datrysiad gwerthfawr i weithwyr gofal iechyd proffesiynol sy’n chwilio am alluoedd mesur a monitro clwyfau manwl ac effeithlon.

Mae ARANZ Medical Ltd, sydd wedi’i leoli yn Christchurch, Seland Newydd, yn ddarparwr blaenllaw o ddatrysiadau meddygol, ac mae’n arbenigo mewn cymwysiadau sganio 3D trawsnewidiol ar gyfer orthoteg, prostheteg a gofalu am glwyfau. Mae’r system mesur a dogfennu clwyfau, Silhouette, yn cipio ac yn cofnodi datblygiad clwyfau allanol dros amser. Gan ddefnyddio camera silwét sydd wedi'i gysylltu â PDA sy'n rhedeg rhaglen meddalwedd symudol Silhouette, mae'n sicrhau mesuriadau a chofnodion manwl gywir. Wedi’i integreiddio â systemau EMR presennol, mae’n cynhyrchu nodiadau cynnydd cynhwysfawr, adroddiadau asesu PDF un-clic, ac yn cefnogi asesiadau teleiechyd. Mae gweinydd Silhouette yn hwyluso trosglwyddo data'n ddiogel i gronfeydd data gwybodaeth cleifion, gan sicrhau argaeledd ar unwaith mewn cofnodion meddygol electronig. Yn y DU, mae cynhyrchion ARANZ Medical yn cael eu marchnata gan Entec Health, sy’n gwasanaethu nifer o ymddiriedolaethau’r GIG.

Mae WoundVision yn gwmni dyfeisiau meddygol arloesol sy'n arbenigo mewn technoleg delweddu clwyfau uwch. Fel darparwr ecsgliwsif gwasanaeth llawn y diwydiant o ddatrysiadau delweddu a chofnodi clwyfau, nod WoundVision yw safoni gweithdrefnau asesu clwyfau, lleihau gwallau mewn dogfennau, a gwella profiadau cleifion ar draws lleoliadau gofal. Mae’r WoundVision Scout, sef camera isgoch digidol â thonnau hir anymwthiol, yn hwyluso’r gwaith o fesur clwyfau’n fanwl drwy gipio delweddau thermol. Mae’n mesur dwysedd thermol, diamedr, arwynebedd, a pherimedr rhannau o’r corff. Mae'r data a gesglir yn cael ei drosglwyddo i gyfrifiadur, gan gynorthwyo clinigwyr i ddogfennu delweddau gweledol ac is-goch a’u hintegreiddio'n ddi-dor i gofnodion meddygol electronig. Mae’n addas ar gyfer cleifion 18 oed a hŷn, ac mae’n cael ei ddefnyddio mewn gwahanol leoliadau gofal iechyd, gan gynnwys ysbytai, meddygfeydd a gofal iechyd yn y cartref. 

Mae cwmnïau allweddol eraill yn cynnwys: 

Mae Rokit Healthcare yn gwmni gofal iechyd byd-eang sy’n ffocysu ar adfywio organau awtologaidd gan ddefnyddio technolegau bioffabrigo perchnogol. Gydag arbenigedd mewn bioargraffu 4D, technolegau bôn-gelloedd awtologaidd, a bioddeunyddiau dynol, mae Rokit ar flaen y gad ym maes meddygaeth adfywiol. Mae’r ap rheoli clwyfau digidol chwyldroadol, Aid Measure, yn mesur dimensiynau clwyfau yn awtomatig - lled, uchder a dyfnder - o un ffotograff. Nod Rokit Healthcare yw trawsnewid sut rydym ni’n ymdrin â’n hiechyd ac yn ei gynnal drwy lwyfannau arloesol ar gyfer adfywio organau ar draws gwahanol glefydau.

Mae WoundMatrix yn gwmni dyfeisiau meddygol sy’n marchnata system meddalwedd rheoli clwyfau cynhwysfawr. Mae llwyfan symudol WoundMatrix yn gallu dogfennu clwyfau’n gyflym, yn gywir ac yn ddibynadwy, a chipio delweddau ac olrhain canlyniadau. Mae rhyngwyneb cryf ar y we yn darparu ar gyfer cipio data a delweddau ar unwaith, gan gynnwys hysbysiadau gwthio amser real ymysg defnyddwyr.  

Mae Healogics Inc yn ddarparwr blaenllaw o wasanaethau gofal clwyfau uwch, gan gynnwys rhaglenni gwella clwyfau, therapi ocsigen hyperbarig, ymgynghoriadau â chleifion, a gofal arbenigol. Gyda’i bencadlys yn Jacksonville, Florida, UDA, mae Healogics Photo+ yn ap symudol y gellir ei lawrlwytho sy’n awtomeiddio mesur clwyfau a ffotograffiaeth, gan symleiddio diagnosis a thriniaeth. Wedi’i integreiddio â WoundSuite, mae’n gwella prosesau olrhain clwyfau drwy alluogi mesuriadau planimetrig cyflym, wedi’u targedu a’u cyfrifo. Mae adnodd cymorth penderfynu cwmwl yr ap yn cael gwared ar yr angen i storio delweddau yn lleol, gan sicrhau diogelwch a chydymffurfiaeth â HIPAA. Mae Healogics yn parhau i chwyldroi gofal clwyfau drwy dechnoleg arloesol a datrysiadau gwella cynhwysfawr.

Perceptive Solutions, cwmni dyfeisiau meddygol sydd â’i bencadlys yn Stevens Point, Wisconsin. Mae'r cwmni wedi datblygu WoundZoom, system mesur a dogfennu clwyfau symudol sy'n defnyddio delweddu 3D i gasglu mesuriadau cywir a chyson o glwyfau. 

Manteision Mabwysiadu

Mae mabwysiadu technoleg gofal clwyfau digidol yn cynnig nifer o ganlyniadau allweddol:

Gwell cywirdeb ac effeithlonrwydd: Gall offer rheoli clwyfau digidol helpu darparwyr gofal iechyd i gofnodi statws clwyfau yn gywir ac yn effeithlon, olrhain cynnydd gwella a monitro canlyniadau triniaeth.

Cyfathrebu gwell: Gall offer rheoli clwyfau digidol hwyluso cyfathrebu rhwng darparwyr gofal iechyd, cleifion a gofalwyr, gan sicrhau bod pawb yn cael gwybod am statws, cynllun triniaeth a chynnydd y clwyf.

Cost-effeithiolrwydd: Drwy leihau’r angen am ymweliadau clinig rheolaidd, gall offer rheoli clwyfau digidol arbed costau gofal iechyd, a gallant hefyd helpu i nodi problemau’n gynharach, a allai atal cymhlethdodau mwy difrifol a fyddai’n gofyn am ymyriadau drutach.

Canlyniadau gwell i gleifion: Gall offer rheoli clwyfau digidol arwain at ganlyniadau gwell i gleifion drwy alluogi asesu a thrin clwyfau’n fwy cywir ac amserol, a all arwain at amseroedd gwella cyflymach a llai o risg o haint.

Hygyrchedd: Mewn ardaloedd gwledig, lle gallai mynediad at ofal iechyd fod yn gyfyngedig, gall adnoddau rheoli clwyfau digidol wella mynediad at wasanaethau gofal clwyfau a darparu mynediad amserol i ddarparwyr gofal clwyfau arbenigol. 

Canlyniadau’r cynllun peilot – Healthy.io

Gwnaeth Healthy.io, enillwyr y Gronfa Datrysiadau Digidol, lwyddo i weithredu a threialu Minuteful for Wounds (MfW) gyda chefnogaeth gan Hwb Gwyddorau Bywyd Cymru. 

Yn unol â'r rhaglen Ddigidol, AI a Roboteg, mae'r fenter hon yn cyfrannu at ddangosyddion perfformiad allweddol (KPIs) ar gyfer y strategaeth Rheoli Clwyfau Digidol. Cafodd MfW, system rheoli clwyfau sy’n seiliedig ar AI i ffonau clyfar, ei gwerthuso gan Fwrdd Iechyd Prifysgol Bae Abertawe rhwng mis Hydref 2021 a mis Chwefror 2023, gan arwain at ganlyniadau sylweddol. Mae’r rhain yn cynnwys arbedion sylweddol o ran amser a chostau, llai o gostau teithio, mwy o apwyntiadau clinig clwyfau, ac effeithiau cadarnhaol ar effeithlonrwydd gweithredol. Mae Adroddiad Archwilio Pwnc (TER) Technoleg Iechyd Cymru yn awgrymu arbedion cenedlaethol posibl o £4 miliwn bob blwyddyn os caiff MfW ei fabwysiadu’n eang.

Deilliannau’r cynllun peilot:

  • Arbedwyd 6,250 o ymweliadau nyrsys ardal (cyfwerth ag 18)
  • Arbedwyd 2,083 o oriau nyrsys ardal o ran amser teithio
  • Arbedwyd £350 oherwydd costau teithio is
  • Crëwyd 1,872 o apwyntiadau clinig clwyfau ychwanegol  
  • 30% yn llai o adolygiadau wyneb yn wyneb ar gyfer nyrsys hyfywedd meinwe  
  • Arbedwyd £169,905 o ganlyniad i symud o gofnodion papur i gofnodion electronig (447,120 dalen o bapur yn costio £0.38 yr un)

Cyd-fynd ag anghenion Iechyd a Gofal Cymdeithasol

Mae rhoi rheoli clwyfau digidol ar waith yn cyd-fynd ag anghenion iechyd a gofal cymdeithasol amrywiol:

  1. Cofleidio dull 'digidol yn gyntaf' mewn perthynas â gofal sylfaenol drwy integreiddio â systemau meddygon teulu, lleihau teithiau cleifion i'r feddygfa, a galluogi mynediad at wybodaeth mewn lleoliadau lluosog.
  2. Helpu i atal clwyfau rhag gwaethygu, gan leihau’r baich ar ofal eilaidd.
  3. Lliniaru’r pwysau sydd ar y gweithlu drwy leihau tasgau gweinyddol.
  4. Helpu clinigwyr a chleifion i reoli clwyfau’n effeithiol drwy nodi diffygion a hybu addasiadau triniaeth.
  5. Sicrhau cost-effeithiolrwydd drwy adnabod clwyfau sy’n marweiddio’n gynnar, osgoi newidiadau diangen i orchuddion, ac arbed amser nyrsys.

Yn Lloegr, mae’r National Wound Care Strategy Programme yn mynd i’r afael â’r anghenion hyn, gan ganolbwyntio’n benodol ar glwyfau cronig ar y coesau, sy’n gyfran sylweddol o’r gwariant ar ofal clwyfau oherwydd eu cyfraddau gwella arafach. Mae'r rhaglen yn pwysleisio hyfforddiant, prosesau sy'n seiliedig ar dystiolaeth, a gweithredu system rheoli clwyfau digidol newydd i wella darpariaeth gofal a chasglu data.

Manylion Cyswllt

Os oes gennych chi ddiddordeb mewn dysgu mwy am ddefnyddio dulliau digidol o reoli clwyfau, neu os ydych chi’n chwilio am gymorth i greu cynnig mabwysiadu mwy teilwredig, cysylltwch â Hwb Gwyddorau Bywyd Cymru gan ddefnyddio ein ffurflen ymholiad arloesi heddiw.