Trydydd parti
Bydd gofal strôc yng Nghymru yn cael ei drawsnewid wrth i dechnoleg deallusrwydd artiffisial (AI) arloesol gael ei chyflwyno ledled y wlad.. Mae Brainomix 360 Strôc yn blatfform sy'n cael ei bweru gan ddeallusrwydd artiffisial sy'n helpu meddygon drwy ddarparu dadansoddiad amser real o sganiau'r ymennydd.
Nod y dechnoleg hon yw gwella penderfyniadau ynghylch triniaeth a throsglwyddo cleifion, gan helpu mwy o gleifion i gael gofal amserol a phriodol.
Cymru yw’r rhanbarth cyntaf yn y DU i roi Brainomix 360 ar waith yn genedlaethol, ac mae’r llwyfan bellach yn fyw. Mae clinigwyr eisoes yn dechrau gweld gwelliant yng nghyfraddau thrombolysis (cyffur ‘chwalu clotiau’), a thrombectomi (tynnu clot gwaed o rydweli yn llawfeddygol).
Ynglŷn â’r prosiect
Cyn mis Hydref 2023, pan ddechreuodd Brainomix 360 gael ei gyflwyno, y gyfradd thrombectomi ledled Cymru oedd 1.8%, gydag amryw o rwystrau ar hyd y llwybr clinigol. Mae’r gyfradd bellach wedi codi i 2.6% yn genedlaethol, ac mae safleoedd unigol a aeth yn fyw yn gynnar yn cyrraedd cyfraddau thrombectomi o 7% a chyfraddau thrombolysis o fwy nag 20%.
Mae clinigwyr yn rhagweld y bydd Brainomix 360 yn gwella ac yn hwyluso’r llwybr ymhellach, a fydd yn ei dro yn arwain at gynnydd yn nifer y cleifion cymwys sy’n cael y triniaethau hyn.
Dywedodd Dr Shakeel Ahmad, Arweinydd Clinigol Cenedlaethol ar gyfer Strôc:
“Mae llwyfan Brainomix 360 Strôc yn newid maes gofal strôc yn sylfaenol. Drwy harneisio pŵer deallusrwydd artiffisial, mae’n adnodd hynod werthfawr sy’n gwella sgiliau ac arbenigedd clinigwyr i roi diagnosis a thrin cleifion strôc yn gyflym ac yn effeithiol.
“Mae strôc yn argyfwng meddygol ac mae amser yn dyngedfennol wrth wneud diagnosis a phenderfynu pa driniaeth sydd orau i bob claf unigol.
"Mae Brainomix 360 yn cynhyrchu gwybodaeth hanfodol yn gyflym o sganiau ymennydd syml ac mae'n cynnig llwyfan diogel i glinigwyr rannu gwybodaeth, delweddau a dadansoddiadau.
“Mae hyn yn ein galluogi i wneud penderfyniadau cyflymach a mwy manwl, a fydd yn ei dro yn gwella ansawdd y gofal a’r canlyniadau i gleifion strôc lle bynnag y maent yn byw yng Nghymru.”
Stori claf
Yn gynharach eleni, collodd Nisha Patel, mam newydd a fferyllydd, deimlad yn ei braich yn sydyn, ynghyd â’i gallu i siarad, wrth roi ei mab i gysgu. Doedd hi ddim yn gallu cysuro ei mab, na defnyddio ei ffôn, a chafodd ei rhuthro i’r ysbyty lle cafodd ddiagnosis o strôc gan feddygon. Wedi’i syfrdanu gan y diagnosis, pryder cyntaf Nisha oedd sut y byddai hyn yn effeithio ar ei gallu i ofalu am ei mab naw mis oed.
Diolch i'r dechnoleg AI newydd hon sy'n cael ei defnyddio mewn ysbytai yng Nghymru, dadansoddodd meddygon ei sganiau ymennydd yn gyflym ac adfer ei lleferydd a'i symudedd o fewn oriau. Mae’r AI yn helpu meddygon i benderfynu a ydynt am roi triniaeth thrombectomi i gael gwared ar glotiau gwaed, neu roi cyffuriau chwalu clotiau.
Nid yw pob claf yn gymwys ar gyfer y triniaethau hyn, gydag oddeutu un o bob pump yn gymwys ar gyfer thrombolysis ac oddeutu un o bob deg ar gyfer thrombectomi. Fodd bynnag, cafodd Nisha’r gofal iawn mewn pryd, gan ganiatáu iddi ddychwelyd i’w bywyd arferol a pharhau â’i rôl fel mam.
I gael rhagor o wybodaeth am stori Nisha, gwyliwch y fideo yma.
Effaith y prosiect
Dr Tom Hughes, Niwrolegydd Ymgynghorol yn Ysbyty Athrofaol Cymru
“Mae cyflwyno Brainomix i unedau strôc yng Nghymru yn gam pwysig iawn ymlaen o ran rheoli cleifion sydd wedi cael strôc am fod rhydweli fawr yn yr ymennydd yn cael ei rhwystro gan glot gwaed.
“Fel clinigwr, mae pa mor gyflym y mae’n dehongli delweddau o’r ymennydd a’r rhydwelïau sy’n darparu’r cyflenwad gwaed, ac ansawdd y delweddau rydyn ni’n eu gweld ar ein cyfrifiaduron neu ein ffonau symudol, wedi gwneud argraff fawr arnaf.
“Dylai pob meddyg strôc yng Nghymru ddysgu sut orau i ddefnyddio Brainomix 360 fel eu bod yn dod yn gyfarwydd â’r ystod o swyddogaethau sydd gan y meddalwedd i’w cynnig, a’r sefyllfaoedd clinigol penodol lle mae’n fwyaf tebygol o ddarparu’r wybodaeth ddefnyddiol a fydd yn ein helpu i drin cleifion strôc yn gyflym.
"Mae eisoes wedi cefnogi ein tîm strôc yng Nghaerdydd drwy gyflymu eu penderfyniadau clinigol i ddarparu triniaethau strôc brys gan gynnwys thrombolysis a thrombectomi mecanyddol.
“Rwy’n edrych ymlaen at weld Brainomix 360 yn dod yn adnodd rydyn ni’n ei ddefnyddio’n rheolaidd mewn ymarfer clinigol.”
Mark Drakeford, Ysgrifennydd y Cabinet dros Iechyd a Gofal Cymdeithasol
"Mae amser yn dyngedfennol mewn gofal strôc, felly rwy'n falch iawn o weld y dechnoleg newydd hon yn mynd yn fyw. Mae'n helpu clinigwyr i werthuso pa mor ddifrifol yw strôc a nodi triniaethau priodol yn gyflym.
“Mae hwn yn un o nifer o ddatblygiadau digidol cyffrous sy’n cael eu mabwysiadu yng Nghymru i wella gofal strôc a bydd yn gwella’r gyfradd thrombectomi a’r canlyniadau i gleifion strôc yn sylweddol.
“Hoffwn ddiolch i bawb a gymerodd ran am eu hymrwymiad a’u hangerdd wrth i’r adnodd AI delweddu strôc hwn gael ei gyflwyno ledled Cymru.”
Riaz Rahman, Cyfarwyddwr, EMEA, Brainomix
“Rydyn ni wedi cydweithio’n agos â’r tîm arweinyddiaeth cenedlaethol i ddeall eu gofynion strategol a darparu ateb wedi’i deilwra a fydd yn trawsnewid y llwybr clinigol strôc i’r 7,400 o ddioddefwyr strôc a amcangyfrifir bob blwyddyn drwy wella diagnosis o strôc a hwyluso penderfyniadau trin a throsglwyddo cyflymach.”
Diagnosis cyflym
Gyda'i offer delweddu lefel uwch a yrrir gan ddeallusrwydd artiffisial, mae Brainomix yn galluogi gweithwyr gofal iechyd proffesiynol i asesu sganiau ymennydd yn gyflym ac yn gywir, gan gyflymu penderfyniadau triniaeth.
Llif gwaith effeithlon
Mae’r platfform yn integreiddio’n ddi-dor â systemau ysbytai, gan symleiddio llif gwaith a lleihau amseroedd diagnosis a thriniaeth i gleifion strôc.
Triniaeth bersonol
Mae Brainomix hefyd yn darparu argymhellion triniaeth wedi’u personoli yn seiliedig ar broffil meddygol unigryw pob claf.
Gwelliannau sy’n seiliedig ar ddata
Mae galluoedd dadansoddi data yn cynnig cipolwg ar dueddiadau a chanlyniadau gofal strôc, gan helpu gweithwyr proffesiynol i fireinio protocolau.
Canlyniadau’r prosiect
Gweithiodd Bwrdd y Rhaglen Strôc Genedlaethol gyda Gweithrediaeth GIG Cymru i gaffael Brainomix 360 ar gyfer y GIG ar sail Cymru gyfan. Mae’r dechnoleg eisoes wedi cael effaith sylweddol ar gyfleusterau gofal iechyd ledled y byd, gyda mabwysiadwyr cynnar yn adrodd am amseroedd byrrach o’r drws-i-driniaeth, gwell canlyniadau i gleifion, a gwell effeithlonrwydd gweithredol.
Dangosodd canlyniadau'r gwerthusiad arfaethedig mwyaf o ddelweddu AI strôc, a oedd yn cynnwys mwy na 80,000 o gleifion strôc ar draws 26 o ysbytai yn Lloegr, fod gweithredu Brainomix 360 Strôc wedi arwain at gynnydd ychwanegol o 50% yn nifer y cleifion sy'n derbyn thrombectomi mecanyddol.
I gael rhagor o wybodaeth am y prosiect, ewch i wefan Brainomix.
Cynnal eich astudiaethau achos ar ein gwefan
Cyflwynwch eich astudiaethau achos trwy ein gwefan at ddiben adolygu, cymeradwyo a hyrwyddo ar draws ein sianeli cyfryngau cymdeithasol.