Mae ArloesiAber (sy’n rhan o Brifysgol Aberystwyth) yn cynnig cyfleusterau ac arbenigedd i fusnesau yn y sectorau biotechnoleg, technoleg amaeth, a bwyd a diod. Yn benodol, mae gan ArloesiAber bum canolfan, yn ffocysu ar fioburo, bwydydd y dyfodol, dadansoddi uwch, bio-fancio hadau ac arloesi.
Mae Cydweithrediad Rhanbarthol ar gyfer Iechyd (ARCH) yn gydweithrediad unigryw rhwng tri phartner strategol; Bwrdd Iechyd Prifysgol Bae Abertawe, Bwrdd Iechyd Prifysgol Hywel Dda a Phrifysgol Abertawe. Nod ARCH yw gwella iechyd a lleihau anghydraddoldebau yn ei ardaloedd a goresgyn heriau o fewn gofal iechyd yng nghefn gwlad ac mewn ardaloedd trefol.
Mae tua 23,000 o fyfyrwyr yn mynychu Prifysgol De Cymru ar draws tri champws yng Nghaerdydd, Casnewydd a Phontypridd. Mae gan y brifysgol dair cyfadran; Cyfrifiadura, Peirianneg a Gwyddoniaeth; Busnes a Diwydiannau Creadigol; a Gwyddorau Bywyd ac Addysg
Mae tua 6,000 o fyfyrwyr yn mynychu Prifysgol Wrecsam ac mae wedi’i rhannu’n ddwy Gyfadran; y Celfyddydau, Gwyddoniaeth a Thechnoleg, a Gwyddorau Cymdeithasol a Bywyd.
Mae tua 13,000 o fyfyrwyr yn mynychu Prifysgol Cymru y Drindod Dewi Sant, sydd â champysau yng Nghaerfyrddin, Llanbedr Pont Steffan, Abertawe, Birmingham a Llundain. Rhennir y brifysgol yn gyfadrannau; Pensaernïaeth, Cyfrifiadura a Pheirianneg; Busnes a Rheolaeth; Dyniaethau a'r Celfyddydau Perfformio; yn ogystal â’r Athrofa Addysg a Choleg Celf Abertawe.
Mae tua 20,000 o fyfyrwyr yn mynychu Prifysgol Abertawe, ac mae’n gartref i dri chyfadran; y Dyniaethau a’r Gwyddorau Cymdeithasol; Meddygaeth, Iechyd a Gwyddorau Bywyd; Gwyddoniaeth a Pheirianneg. Mae’r gyfadran Meddygaeth, Iechyd a Gwyddorau Bywyd yn gartref i Ysgol Feddygaeth Prifysgol Abertawe. Yn Fframwaith Rhagoriaeth Ymchwil 2021, dangosodd Abertawe gryfder penodol mewn Proffesiynau Perthynol i Iechyd, Deintyddiaeth, Nyrsio ac Ymchwil Fferylliaeth.
Mae tua 22,000 o fyfyrwyr yn mynychu Prifysgol Metropolitan Caerdydd, wedi'u rhannu ar draws pum ysgol: Celf a Dylunio, Addysg a Pholisi Cymdeithasol, Rheoli, Chwaraeon a Gwyddorau Iechyd, a Thechnolegau.
Prifysgol Caerdydd yw unig aelod Grŵp Russell o brifysgolion ymchwil-ddwys Prydain yng Nghymru. Mae tua 34,000 o fyfyrwyr yn mynychu'r brifysgol ac mae'n cynnwys Ysgol Meddygaeth Prifysgol Caerdydd. Yn Fframwaith Rhagoriaeth Ymchwil 2021, cafodd y brifysgol ei chydnabod fel canolfan ragoriaeth ar gyfer seicoleg, seiciatreg a niwrowyddoniaeth.
Mae tua 10,000 o fyfyrwyr yn mynychu Prifysgol Bangor, sydd wedi’i lleoli yng ngogledd Cymru. Mae gwaith ymchwil y brifysgol yn canolbwyntio ar dair thema allweddol, sef ynni a’r amgylchedd; iechyd, lles ac ymddygiad; ac iaith, diwylliant a chymdeithas. Mae Ysgol Feddygol Gogledd Cymru wedi’i lleoli yn y brifysgol, a disgwylir y garfan gyntaf o fyfyrwyr meddygaeth ym mis Medi 2024.
Mae dros 8,000 o fyfyrwyr yn mynychu Prifysgol Aberystwyth, sy’n cynnwys tri chyfadran; y Celfyddydau a Gwyddorau Cymdeithasol, Busnes a Gwyddorau Ffisegol, a Gwyddorau’r Ddaear a Bywyd.
