Mae Syniadau iach yn edrych ar dechnoleg gynorthwyol ac yn gofyn ydy Cymru yn colli cyfle i fod ar flaen y gad wrth ddatblygu a darparu sustemau dwyieithog?
![Excited senior couple using a Virtual Assistant at home](/sites/default/files/2022-05/Excited%20senior%20couple%20using%20a%20Virtual%20Assistant%20at%20home.jpg)
Mae technoleg gynorthwyol fel cadeiriau olwyn, a llinellau cysylltiol ar gael 24/7 yn galluogi pobl i fyw yn ddiogel ac annibynnol yn eu cartrefi ac mae’r dechnoleg yn dod yn fwy soffistigedig gydag iPads, robotiaid, systemau cysylltiedig a thechnoleg gwisgadwy bellach yn cael eu defnyddio i ddarparu iechyd a gofal cymdeithasol.
Yn y podlediad mae Gareth Rees, Arweinydd Rhaglen Arloesi Strategol Llesiant Delta, a Huw Marshall o gwmni Annwen Cymru yn trafod y sialens ynglyn â darparu’r dechnoleg a’i gwneud ar gael yn Gymraeg.
Mae Gareth yn arwain prosiectau ag elfen ddigidol fel rhan o'r gwasanaeth Connect sydd ar gael yn Sir Benfro, Ceredigion a Chaerfyrddin. Yn ôl Gareth mae nifer o bobl yn hoffi cyfathrebu gyda’r staff yn ei mamiaith, sef Cymraeg.
“Ma lot o dystiolaeth fod pobl yn fwy cyffyrddus yn trafod pethau meddygol gyda’i meddyg yn eu hiaith gyntaf. A phan ma pobl wedi drysu mae nhw’n mynd yn ôl i’w iaith gynta,” medd Gareth.
Gyda deng mlynedd ar hugain o brofiad yn gweithio yn y cyfryngau mae Huw Marshall wedi sefydlu cwmni Annwen Cymru sydd wrthi’n datblygu rhwydwaith o hybiau cysylltiol a llwyfan creu cynnwys gyda ffocws gymunedol.
Mae pobl wedi dod i arfer â chyfathrebu gyda theclynau fel Alexa a Siri, ond yn Saesneg, meddai.
“Mae technoleg ar gael nawr lle ry ni’n medru siarad efo dyfais yn hytrach na mewnbynnu drwy keypad ond mae’r gallu i wneud hynny yn Gymraeg yn mynd i fod yn bwysig iawn.”
“Pan fo pobl yn dioddef gyda dementia be sy mynd gynta yw ei sgiliau ail iaith felly mae’r angen i medru cyfathrebu efo technoleg yn Gymraeg yn hanfodol.”
Mae Huw yn gweld bod na gyfle i arloeswyr yng Nghymru ddatblygu ac arbennigo mewn meddalwedd a thechnoleg dwyieithog.
“Mae tua 20% o’r byd yn siarad ieithoedd lleiafrifol. Ydy, mae o’n niche, ond mae o’n niche enfawr i ni fedru gwasanaethu,” medd Huw.
Gwrandewch nawr:
Fel arall, gallwch wrando ar bodlediad Syniadau Iach ar: Apple Podcasts, Spotify a Google Podcasts.
Healthy Thinking
Mae ein chwaer podlediad Saesneg, Healthy Thinking yn trafod technolegau cynorthwyol gyda Carla Dix o gwmni Delta Wellbeing. Gwrandewch nawr.