Cyflwyno technoleg rheoli poen arloesol i wasanaethau gofal cymdeithasol

Mae PainChek yn adnodd asesu poen ar sail deallusrwydd artiffisial sy’n sganio symudiadau’r wyneb i asesu lefel y boen y mae unigolyn yn ei chael. Gellir cwblhau’r sgan ar yr wyneb o hyd at dri metr i ffwrdd, gan leihau unrhyw drallod i’r defnyddiwr gwasanaeth. Yna, mae gofalwyr yn defnyddio’r teclyn i gwblhau asesiad dan arweiniad ar gyfer dangosyddion poen eraill, fel symudiadau'r corff. Y canlyniad yw sgôr poen gyffredinol, a chofnod o’r asesiad sydd wedi cael ei gynnal. Mae hyn yn caniatáu i ofalwyr wneud penderfyniadau clinigol a mwy gwybodus am leddfu poen. 

Wedi’i ddatblygu yn Awstralia, mae’r adnodd eisoes yn cael ei ddefnyddio mewn tua 70% o gartrefi gofal preswyl ar gyfer pobl hŷn yno. Mae bellach yn ehangu’n gyflym i rannau eraill o’r byd, gan gynnwys y DU, Gogledd America, Singapore a Seland Newydd.  

O fewn 6 mis i lansio'r cynllun peilot: 

• 18 o gartrefi gofal wedi cofrestru i gymryd rhan - bron i draean o gartrefi gofal ynf Ngwent.
• Cartefi gofal ar draws y pum awdurdod lleol yng Ngwent yn cymryd rhan, gan gynnwys cartrefi preifat a chartrefi a ariennir gan awdurdodau lleol. 
• 905 o drigolion yn elwa.

• Llai o ddefnydd o feddyginiaethau gwrthseicotig. 
• Defnydd gwell o boenladdwyr (lleddfu poen). 
• Mwy o ddiogelwch a boddhad i ofalwyr a phreswylwyr.  

“Mae canllawiau NICE yn argymell asesiadau poen misol ar gyfer preswylwyr cartrefi gofal. Fel arfer, gwelwn eu bod yn cael eu gwneud yn llawer llai aml a, phan fyddant yn cael eu gwneud, nid ydynt yn asesiadau ffurfiol, wedi’u dogfennu gan amlaf. Pan fyddant yn cael eu dogfennu, nid yw hyn fel arfer yn cael ei wneud yn ‘fyw’ gyda’r preswylydd; yn hytrach mae’n cael ei ysgrifennu beth amser yn ddiweddarach yn y swyddfa. Mae PainChek yn caniatáu i ofalwyr gynnal yr asesiadau rheolaidd hynny o boen, eu cofnodi mewn amser real a chael gafael ar ddata hydredol ar sut mae eu preswylwyr yn gwneud.” 

Aimee Twinberrow, cyn Arweinydd Prosiect yn Hwb Gwyddorau Bywyd Cymru, sydd bellach yn Arweinydd Arloesi Digidol yn Gofal Cymdeithasol Cymru 

Roedd dadansoddiad annibynnol gan KPMG o gyflwyno PainChek ar raddfa fawr ar draws Awstralia yn dangos bod sgoriau poen mewn cartrefi sy’n cymryd rhan wedi gostwng dros amser, sy’n awgrymu bod gan PainChek effaith gadarnhaol ar reoli poen a’i fod yn lleihau’r baich o ran poen i breswylwyr. 

Yn ôl canlyniadau diweddar cynllun peilot yn Lloegr, roedd gostyngiad o 50% mewn ymddygiadau gofidus yn cael ei ystyried yn gysylltiedig â phoen, a chynnydd o 50% yn nifer y preswylwyr sy’n cael meddyginiaeth lleddfu poen yn rheolaidd o ganlyniad i boen sy’n cael ei nodi o’r newydd. 

Mae’r gwerthusiad yng Ngwent yn archwilio ac yn gwirio’r manteision y mae PainChek yn adrodd arnynt ar gyfer ei sylfaen defnyddwyr byd-eang, gan gynhyrchu tystiolaeth o’r effaith y mae’n ei chael ar ddefnyddwyr gwasanaethau yng Nghymru. Dyma rai o’r effeithiau disgwyliedig ar ddefnyddwyr gwasanaeth a ddylai ddeillio o reoli poen yn well: 

• Llai o gwympiadau. 
• Gwell maeth drwy fwyta bwyd a hylifau’n well. 
• Gwella symptomau cyflyrau eraill. 

Mae cynlluniau peilot eraill yn PainChek wedi cofnodi cymaint â chynnydd o 100% yn amlder yr asesiadau o boen sy’n cael eu cynnal mewn cartrefi. Ar gyfer yr asesiadau hynny, mae darparwyr gofal bellach wedi cofnodi tystiolaeth o asesiadau o boen, wedi’u cofnodi’n fwy cywir mewn senario ‘byw’ gyda’r preswylwyr, ac yn gyflymach na’r asesiadau papur traddodiadol. 

Mae gan reolwyr cartrefi gofal fynediad at borth dadansoddi i olrhain asesiadau o boen unigolyn, yn ogystal ag a yw gwelliannau’n cael eu gweld ar draws eu poblogaeth breswyl.  

Dylai’r asesiadau o boen arfogi gofalwyr i wneud y canlynol: 

• Gwneud penderfyniadau ar sail tystiolaeth ar feddyginiaeth. 
• Lleihau ymddygiad heriol mewn preswylwyr sy’n deillio o reoli poen yn wael. 
• Gwella rhannu data ar draws timau amlddisgyblaethol. Yn ôl dadansoddiad o’r cyflwyno yn Awstralia, roedd 78% o gartrefi yn aml yn rhannu canlyniadau PainChek â meddygon teulu, ffisiotherapyddion, therapyddion galwedigaethol a gwasanaethau cymorth dementia. 

O ganlyniad i reoli poen ac ymddygiad heriol yn well, disgwylir hefyd y bydd llai o ymweliadau heb eu cynllunio gan feddygon teulu a derbyniadau i’r ysbyty. 

Fel sgil-effaith ychwanegol i ofalwyr, mae adborth cynnar gan gartrefi gofal yn awgrymu bod yr adnodd yn cael effaith gadarnhaol ar feithrin sgiliau digidol ar gyfer gofalwyr.