Mae Hwb Gwyddorau Bywyd Cymru yn gweithio fel Llysgenhadon Mabwysiadu gyda thri uwch arweinydd o GIG Cymru.
Yn ddiweddar mae Dr Mark Briggs, Cyfarwyddwr Cynorthwyol Arloesi Bwrdd Iechyd Prifysgol Caerdydd a’r Fro, Dr Leighton Phillips, Cyfarwyddwr Ymchwil, Arloesi a Phartneriaethau Prifysgol Bwrdd Iechyd Prifysgol Hywel Dda a Dr Tom Powell, Pennaeth Arloesi ym Mwrdd Iechyd Prifysgol Cwm Taf Morgannwg wedi ymuno â thîm Hwb Gwyddorau Bywyd Cymru er mwyn datblygu rhwydwaith ledled Cymru.
Gan weithio ar sail Cymru gyfan, byddant yn cefnogi rhwydweithio a chydweithio cryfach ar draws yr ecosystem arloesi gyda ffocws ar gyflymu'r broses o fabwysiadu cynnyrch a gwasanaethau arloesol allweddol ar gyflymder ac ar raddfa fawr.
Dywedodd Dr Rhodri Griffiths, Cyfarwyddwr Mabwysiadu Arloesi Hwb Gwyddorau Bywyd Cymru:
“Nid yw mabwysiadu cynnyrch ac atebion arloesol newydd a all drawsnewid gwasanaethau iechyd a gofal cymdeithasol yn digwydd mor gyflym ag yr hoffem, nac ar y raddfa sydd ei hangen, ac mae hynny’n bennaf oherwydd heriau o ran y system a chapasiti. Rwy’n falch iawn y bydd ein llysgenhadon mabwysiadu newydd yn helpu i nodi sut gellir goresgyn y rhwystrau presennol, gan adeiladu a chefnogi partneriaethau cryfach gan ddefnyddio eu rhwydweithiau helaeth a’u dealltwriaeth o arloesi i ysgogi newid angenrheidiol.”
Sut byddant yn cefnogi mabwysiadu arloesi yn gyflymach?
Bydd y Llysgenhadon Mabwysiadu yn helpu i gryfhau cydberthnasau ledled Cymru, rhwng gweithwyr iechyd a gofal cymdeithasol proffesiynol, y byd academaidd a’r diwydiant drwy ymgysylltu’n uniongyrchol, cefnogi’r gwaith o adeiladu rhwydweithiau a chymryd rhan mewn gweithgareddau amrywiol.
Byddant yn darparu pont bwysig rhwng sefydliadau lleol, cenedlaethol a rhyngwladol sy'n cyflwyno mentrau a rhaglenni gwaith, gan weithredu fel eiriolwyr. Gan nodi anghenion a chefnogi prosiectau arloesol, datrysiadau ac arfer gorau, bydd y llysgenhadon yn codi ymwybyddiaeth o gyfleoedd, yn cefnogi’r gwaith o’u cyflwyno, ac yn cysylltu arloeswyr â'r ystod o gymorth y mae Hwb Gwyddorau Bywyd Cymru yn ei darparu gan gynnwys sganio'r gorwel, sicrhau cyllid a chyflawni prosiectau.
Beth fydd pob Llysgennad yn ei wneud?
Mae pob un o’r Llysgenhadon Mabwysiadu yn dod â chyfoeth o brofiad o weithio yn y GIG, y byd academaidd a’r diwydiant gyda nhw. Byddant yn treulio hyd at un diwrnod yr wythnos fel llysgenhadon anrhydeddus, gyda gwaith pob unigolyn yn cyd-fynd â thema sydd wedi’i nodi’n allweddol ar gyfer trawsnewid i Gymru Iachach.
Mae Dr Tom Powell yn canolbwyntio ar fabwysiadu datrysiadau deallusrwydd digidol yn effeithiol fel rhan o raglen Ecosystem Iechyd Digidol Cymru.
Dywedodd Dr Tom Powell:
“Os caiff ei ymgorffori’n llwyddiannus yn systemau iechyd a gofal cymdeithasol GIG Cymru, bydd deallusrwydd artiffisial ac arloesi digidol yn helpu i wella bywydau. Mae’r chwyldro digidol yn mynd rhagddo, a hyd yn hyn dim ond cyfran fach o beth sy’n bosibl rydyn ni wedi’i weld. Rwy’n falch iawn o fod yn gweithio gyda Hwb Gwyddorau Bywyd Cymru er mwyn hwyluso mabwysiadu datrysiadau digidol newydd i bawb sy’n rhan o’r broses.”
Mae Dr Mark Briggs yn canolbwyntio ar feddygaeth fanwl, gan symud o’r cysyniad traddodiadol bod un math o feddyginiaeth yn addas i bawb i fodel rheoli clefydau mwy ataliol a phersonol sy'n cael ei arwain gan ddata.
Dywedodd Dr Mark Briggs:
“Rydym wedi gweld cynnydd anhygoel mewn meddygaeth fanwl ac edrychwn ymlaen at ddatblygu a mabwysiadu’n gyflymach yng Nghymru. Mae hyn yn cynnig cyfleoedd enfawr sydd o fudd i bobl ac yn darparu llwyfan i weithio’n agos gyda diwydiant i gyd-ddatblygu datrysiadau, yn ogystal â datblygu arbenigedd a chymhwysedd yn y maes hwn. Edrychaf ymlaen at barhau i gyfrannu a chefnogi clinigwyr, ymchwilwyr, datblygwyr, arloeswyr a mabwysiadwyr i wneud gwahaniaeth.”
Mae Dr Leighton Phillips yn canolbwyntio ar nodi'r newidiadau i'r system a goresgyn rhwystrau i sicrhau mynediad cyflymach at arloesi.
Dywedodd Dr Leighton Phillips:
“Mae cymaint o ddatblygiadau arloesol sy’n cynnig y potensial i fynd i’r afael â heriau pwysig a thrawsnewid ein gwasanaethau iechyd a gofal cymdeithasol. Mae gan Gymru gyfleoedd gwych ac enghreifftiau o arfer gorau, ond mae angen i ni gryfhau ein llwybrau arloesi, gan wella a symleiddio llwybrau mabwysiadu. Mae gan Hwb Gwyddorau Bywyd Cymru ran bwysig i'w chwarae wrth gynnull a chefnogi partneriaid allweddol i weithio gyda'i gilydd i fwrw ymlaen â'r newidiadau system Cymru gyfan sydd eu hangen.”
Sut gallaf gymryd rhan?
Os hoffech chi ddysgu mwy am sut y gallai Hwb Gwyddorau Bywyd Cymru a’n Llysgenhadon Mabwysiadu gefnogi eich datrysiad arloesol chi i’w fabwysiadu a'i ledaenu ledled Cymru ar gyflymder ac ar raddfa fawr, yna cysylltwch â ni drwy anfon e-bost at hello@lshubwales.com.
