Cam nesaf y broses o reoli meddyginiaethau’n annibynnol drwy gymorth digidol

Mae mwy a mwy o bobl ledled y DU yn cymryd nifer fawr o feddyginiaethau, ac mae hynny’n creu her i’r maes iechyd a gofal cymdeithasol i sicrhau eu bod yn cymryd eu meddyginiaethau’n gywir ac ar amser. 

Un ateb posibl ydy adnoddau digidol i reoli meddyginiaethau. Cafodd un ei werthuso gan Fwrdd Iechyd Prifysgol Cwm Taf Morgannwg (BIPCTM), Cyngor Bwrdeistref Sirol Pen-y-bont ar Ogwr a Hwb Gwyddorau Bywyd Cymru. Gwelwyd bod yr adnodd a gafodd ei greu gan YOURmeds yn helpu pobl i gymryd y feddyginiaeth iawn ar yr adeg iawn – gan roi iddynt fwy o annibyniaeth, lleihau niwed a rhoi tawelwch meddwl i’w hanwyliaid. Mae rhagor o wybodaeth i’w gweld ar ein tudalen sydd wedi’i chreu ar gyfer y prosiect. 

Yng ngham dau o’r cam gwerthuso hwn rydym yn datblygu’r gwasanaeth ymhellach ac yn adeiladu ar y gwersi a ddysgwyd ac ar y llwyddiannau. Cyflwynwyd contract i YOURmeds drwy’r her Gofal Cartref dan arweiniad Contractau ar gyfer Arloesi Cymru ac fe’i hariennir gan Lywodraeth Cymru. Gan weithio gyda phartneriaid o wahanol sectorau, fe wnaethant gydweithredu i ehangu cwmpas y gwasanaeth a’i wneud yn fwy rhagweithiol ac ymatebol drwy ddefnyddio adnoddau digidol.  

Nodau’r project 

• Dal ati i recriwtio pobl sy’n dechrau defnyddio gwasanaethau tymor byr er mwyn annog annibyniaeth ac atal yr angen am ofal.
• Cynnal adolygiad o’r bobl sydd eisoes yn cael pecynnau gofal cartref i weld a ellid defnyddio dyfais ddigidol na chafodd ei chynnig o’r blaen, er mwyn gwella annibyniaeth bersonol, gwneud pecynnau gofal yn llai dwys a rhyddhau capasiti yn y system ofal.
• Rhoi mwy o ffocws ar ddatblygu gwasanaethau y gellir eu hehangu a chynnig y potensial i’w mabwysiadu’n ehangach yn ardal yr Awdurdod Lleol/Bwrdd Iechyd.
• Datblygu porth ar-lein YOURmeds i sicrhau bod modd rheoli carfannau mawr o ddefnyddwyr gwasanaethau o bell, a rhoi darlun cliriach o’r holl ddyfeisiau presennol drwy gyfrwng un dangosfwrdd canolog.
• Drwy gyfrwng gwaith ymchwil a datblygu yn sgil y prosiect peilot blaenorol, creu gwasanaeth meddyginiaeth digidol rhagweithiol ac ataliol a fydd yn defnyddio mantais data diagnostig fel arwydd cynnar o ddirywiad yn lles rhywun. 

Amcanion y Prosiect 

• Cynyddu’r niferoedd sy’n glynu wrth eu trefn cymryd meddyginiaethau yn gyffredinol ym Mhen-y-bont ar Ogwr i 80% neu uwch.
• Mwy o gleifion yn glynu wrth eu trefn cymryd meddyginiaeth, gan arwain at wastraffu llai o feddyginiaeth.
• Gwerthuso manteision darparu technoleg ddigidol i helpu pobl i lynu wrth eu trefn cymryd meddyginiaethau yn lle cynnal galwadau cymorth gofal cartref.
• Gwerthuso a yw dyfeisiau meddyginiaeth digidol yn helpu i gynyddu annibyniaeth a hyder defnyddwyr gan ganiatáu iddynt aros yn eu cartrefi eu hunain yn hirach.
• Mesur a yw symleiddio’r drefn cymryd meddyginiaeth, os nad yw dyfais ddigidol yn briodol o bosibl, yn ddull effeithiol o leihau galwadau gofal cartref ar gyfer y rheini sy’n cael cymorth gofal ar gyfer meddyginiaethau ar hyn o bryd.
• Creu platfform monitro o bell canolog gwell ac unigryw sy’n gallu cysylltu â nifer o ddyfeisiau meddyginiaeth sy’n darparu data amser real am lynu wrth drefn cymryd meddyginiaethau i wasanaethau cymunedol ac ymateb yn unol â’r data hwnnw.
• Gwerthuso a fydd y platfform monitro o bell canolog newydd yn helpu’r tîm optimeiddio meddyginiaethau i oruchwylio carfannau mawr o unigolion yn effeithiol gan ddefnyddio dyfeisiau meddyginiaeth yn y gymuned, i ddarparu gwasanaeth y gellir ei ehangu.
• Ystyried manteision cysylltu pob dyfais meddyginiaethau ddigidol â Chanolfan Derbyn Larymau yn ogystal â chylch gofal teuluol.