Rydyn ni’n falch iawn o lansio ein cyfres ddiddorol o astudiaethau achos digidol sy’n tynnu sylw at y datblygiadau arloesol ym maes canser sy’n digwydd yng Nghymru.
Mae’r gyfres hon, sy’n cynnwys prosiectau arloesol gan QuicDNA a CanSense, yn dangos ymrwymiad i hyrwyddo gofal canser drwy dechnolegau a dulliau arloesol.
Mae gwella canlyniadau canser yng Nghymru yn flaenoriaeth. Rydyn ni’n gweithio gydag iechyd, gofal cymdeithasol, y byd academaidd a diwydiant i gyflymu’r gwaith o ddatblygu atebion arloesol ar gyfer gofal canser. Mae’r gyfres hon o fideos yn tynnu sylw at waith rhyfeddol QuicDNA a CanSense, gan ganolbwyntio ar ddatblygiadau ym maes canfod yn gynnar a thriniaethau wedi’u targedu. Mae gan y datblygiadau arloesol hyn y potensial i achub bywydau, gwella canlyniadau cleifion, a lleihau straen ar systemau gofal iechyd.
Mae’r fideos astudiaeth achos yn cynnwys dau brosiect arwyddocaol:
QuicDNA: Mae’r prosiect hwn yn cynnwys partneriaid traws-sector a chyllidwyr i sicrhau cyrhaeddiad ac effaith eang technoleg biopsi hylif. Mae biopsi hylif yn ddewis arall syml ac anymwthiol yn lle biopsïau tiwmor llawfeddygol a wneir drwy brawf gwaed, neu gellir ei ddefnyddio i ategu biopsi tiwmor i gwtogi’r amser at driniaeth. Mae’r fideo hefyd yn cynnwys gwybodaeth gan Craig Maxwell, sy’n trafod effaith y prosiect hwn, a phwysigrwydd ymdrechion codi arian parhaus.
“Rwy’n credu bod Craig wedi bod yn gwbl unigryw yn hyn o beth. Mae wedi manteisio ar y cyfle, er bod ganddo ddiagnosis datblygedig o ganser, i ddweud beth y gall ei wneud i wella’r system a gwella canlyniadau i gleifion sy’n dod ar ei ôl. Sy'n ysbrydoliaeth i’r gweddill ohonom. Mae’n ein hysbrydoli i weithio’n fwy effeithiol ledled Cymru.” Yr Athro Tom Crosby, Cyfarwyddwr Clinigol Canser Cymru
CanSense: cwmni technoleg feddygol newydd sy'n canolbwyntio ar ddatblygu prawf gwaed ar gyfer diagnosis anymwthiol o ganser y coluddyn, gan ddefnyddio modelau sy’n cael eu gyrru gan ddeallusrwydd artiffisial. Canser y colon a'r rhefr, y cyfeirir ato hefyd fel canser y coluddyn, yw'r trydydd canser mwyaf cyffredin yn fyd-eang. Mae’n cyfrif am tua 10% o’r holl ddiagnosis o ganser a dyma’r ail brif achos o farwolaethau sy’n gysylltiedig â chanser yn fyd-eang.
“Mae cleifion yn deall prawf gwaed CanSense: mae’n syml, yn dderbyniol ac yn cael ei ffafrio’n gryf dros golonosgopïau diangen. Mae gallu’r prawf i ganfod arwyddion cynharaf canser yn anhygoel o gyffrous. Mae’r hyn y mae CanSense yn ei wneud yn newid y dirwedd o ran sut rydyn ni’n canfod canser er gwell. Mae’n lle cyffrous iawn i fod ar hyn o bryd.” Yr Athro Dean Harris, Cyfarwyddwr Clinigol CanSense.
Gall canser atal pobl rhag byw bywydau iachach a hirach, a chynyddu’r pwysau ar y system iechyd a gofal cymdeithasol. Gallwn helpu i wella hyn drwy yrru arloesedd ym maes gwyddorau bywyd i reng flaen gofal.
“Mae gofal canser yng Nghymru yn datblygu, ond mae heriau’n parhau. Drwy arddangos datblygiadau arloesol fel QuicDNA a CanSense, ein nod yw ysbrydoli a dangos sut gall technolegau arloesol drawsnewid sut mae canser yn cael ei ganfod a’i drin. Mae partneriaethau ar draws iechyd, gofal cymdeithasol a diwydiant yn hanfodol. Rydyn ni’n meithrin cydweithio i gyflymu’r gwaith o gyflwyno atebion arloesol ar gyfer gofal canser.” - Cari-Anne Quinn, Prif Weithredwr Hwb Gwyddorau Bywyd Cymru
Gwyliwch y gyfres lawn o fideos i ddysgu mwy am y gwaith arloesol sy’n cael ei wneud gan QuicDNA a CanSense ar ein sianel YouTube.
Rydyn ni hefyd yn annog partneriaid yn y diwydiant sydd ag atebion arloesol i ganser i ymuno â ni yn y frwydr yn erbyn canser. Gallwch gyflwyno eich syniadau arloesol yma: Ffurflen ymholiadau am arloesi | Gwyddorau Bywyd (lshubwales.com)
Diolch yn arbennig i’r holl randdeiliaid sy’n ymwneud â’r ddau brosiect. Drwy gydweithio, rydym wedi cyflymu’r gwaith o gyflwyno gofal canser arloesol yng Nghymru.
QuicDNA: AWMGS, Ymchwil Iechyd a Gofal Cymru, Y Ganolfan Treialon Ymchwil, Bwrdd Iechyd Prifysgol Aneurin Bevan, Bwrdd Iechyd Prifysgol Caerdydd a’r Fro, Rhwydwaith Canser Cymru, Llywodraeth Cymru, Moondance Cancer Initiative, Gofal Canser Tenovus, Amgen, Illumina, AstraZeneca, Bayer, Lilly
CanSense: Ymchwil Canser Cymru, Ymchwil Iechyd a Gofal Cymru, Sefydliad Cenedlaethol dros Ymchwil Iechyd, Bwrdd Iechyd Prifysgol Bae Abertawe, Prifysgol Abertawe, a llawer mwy.
