Mae Ysbrydoli Arloesedd yn grynodeb misol o’r newyddion o dirwedd arloesi ffyniannus Cymru a gasglwyd gan Dîm Gwybodaeth y Sector ac mae’n sbarduno ein huchelgais i godi Cymru fel lle y mae pobl yn ei ddewis ar gyfer arloesi a buddsoddi ym maes iechyd a gofal cymdeithasol.
Cyfnod cyffrous arall i dirwedd arloesi ffyniannus Cymru! Y mis hwn, rydyn ni wedi gweld y byd academaidd a gofal iechyd yn cydweithio i gyflymu arloesi, ymchwil a datblygu...
Prifysgol De Cymru a Bwrdd Iechyd Prifysgol Caerdydd a’r Fro yn cydweithio i ddatblygu rhaglen symudol AI ar gyfer rhoi diagnosis o ganserau’r croen
Dan arweiniad yr Athro Cyswllt Dr Janusz Kulon, bydd yr ap yn defnyddio camera ffonau clyfar i ddadansoddi nodweddion namau croen fel siâp, lliw, anghymesuredd, ac anghysondebau eraill i ganfod tyfiannau malaen posibl. Y nod yw creu ap wedi’i ddilysu’n glinigol sy’n gallu helpu meddygon teulu i benderfynu a oes angen atgyfeiriad dermatolegydd.
Mae’r ap yn defnyddio deallusrwydd artiffisial deallus ac mae’n cael ei dreialu gan ddefnyddio data cleifion y GIG a ddarperir gan Fwrdd Iechyd Prifysgol Caerdydd a’r Fro. Mae ymchwilwyr wrthi’n datblygu algorithmau i ddeall sut mae namau wedi effeithio ar gleifion yn y gorffennol ac y gellir eu defnyddio wedyn ar gyfer gwneud penderfyniadau clinigol yn y dyfodol.
Dywedodd Dr Kulon:
“Drwy gael mynediad at ddata cleifion a chanlyniadau archwiliadau arbenigwyr, gan gynnwys canlyniadau histopatholeg, gallwn nodi nodweddion penodol unrhyw annormaleddau sy’n heriol yn ddiagnostig a datblygu system fwy gwrthrychol i helpu meddygon teulu i roi diagnosis o namau croen”.
“Fodd bynnag, nid yw'n disodli arbenigedd dynol, nid ydym yn creu blwch du meddygol arall, rydym yn creu algorithm AI y mae modd ei ddehongli i gefnogi asesiad diagnostig. Ar ôl datblygu’r ap, bydd yn adnodd a fydd yn cefnogi’r arbenigwyr yn eu gwaith ac yn bâr ychwanegol o lygaid a fydd yn gallu helpu i wneud y system diagnosis yn fwy effeithlon.”
Prifysgol Caerdydd yn lansio’r Sefydliad Arloesedd Niwrowyddoniaeth ac Iechyd Meddwl (NMHII)
Bydd y sefydliad hwn yn defnyddio ymchwil am iechyd meddwl ac iechyd yr ymennydd Prifysgol Caerdydd, sydd gyda’r gorau yn y byd, i wella bywydau cleifion a’u teuluoedd.
Mae’r sefydliad yn rhan o fuddsoddiad gwerth £5.4 miliwn gan Brifysgol Caerdydd mewn pum sefydliad arloesedd ac ymchwil i fynd i’r afael â’r materion mwyaf sy’n wynebu cymdeithas, yr economi a’r amgylchedd.
Dyma "feysydd her" y sefydliad:
- Trosi canfyddiadau genomeg i ddatgelu bioleg clefydau niwrowyddoniaeth.
- Cyfuno genomeg a data mawr i ddatgloi gwybodaeth newydd am haeniad anhwylderau’r ymennydd.
- Datblygu meddyginiaethau newydd ar gyfer triniaethau iechyd meddwl a’r ymennydd.
- Defnyddio gwyddorau cymdeithasol i wella iechyd meddwl y gymdeithas.
Mae’r sefydliad yn gartref i 21 o brif ymchwilwyr, 23 o staff ymchwil cyswllt ac 17 o ymchwilwyr ar ddechrau eu gyrfa sydd â chryfderau mewn bioleg bôn-gelloedd, niwrobioleg systemau, a delweddu, a bydd yn gweithio’n agos gyda chanolfannau niwrowyddorau eraill ym Mhrifysgol Caerdydd.
Ydy hyn wedi’ch ysbrydoli chi? Os oes gennych chi ddiddordeb mewn gweithio ym maes arloesi y sector iechyd a gofal cymdeithasol yng Nghymru, gallwn ni helpu. Cysylltwch â ni drwy lenwi ein Ffurflen Ymholiad Arloesi. Gyda’n gilydd, gallwn drawsnewid gofal iechyd yng Nghymru.
