Gofal iechyd

Sefydliad ymchwil ym Mhrifysgol Caerdydd yw DECIPHer ac mae’n cael ei ariannu gan Ymchwil Iechyd a Gofal Cymru. Mae DECIPHer yn dod ag arbenigwyr o amrywiaeth o ddisgyblaethau ynghyd i fynd i’r afael â materion iechyd y cyhoedd fel deiet a maeth; gweithgarwch corfforol; a thybaco, alcohol a chyffuriau, gan ganolbwyntio’n benodol ar ddatblygu a gwerthuso ymyriadau a fydd yn cael effaith ar iechyd a lles plant a phobl ifanc.

Mae Medicentre Caerdydd yn ddeorydd i egin fusnesau ym maes biotechnoleg a thechnoleg feddygol. Mae’n fenter ar y cyd rhwng Bwrdd Iechyd Prifysgol Caerdydd a’r Fro a Phrifysgol Caerdydd.

Comisiwn Bevan yw melin drafod iechyd a gofal fwyaf blaenllaw Cymru. Mae’r comisiwn yn dod ag arbenigwyr iechyd a gofal rhyngwladol at ei gilydd i ddarparu cyngor annibynnol ac awdurdodol i Lywodraeth Cymru ac arweinwyr y GIG yng Nghymru.

Mae Sefydliad Awen yn dod ag ymchwilwyr, pobl hŷn a’r diwydiannau creadigol ynghyd i gydgynhyrchu cynnyrch, gwasanaethau ac amgylcheddau ar gyfer heneiddio’n iach.

Mae Cydweithrediad Rhanbarthol ar gyfer Iechyd (ARCH) yn gydweithrediad unigryw rhwng tri phartner strategol; Bwrdd Iechyd Prifysgol Bae Abertawe, Bwrdd Iechyd Prifysgol Hywel Dda a Phrifysgol Abertawe. Nod ARCH yw gwella iechyd a lleihau anghydraddoldebau yn ei ardaloedd a goresgyn heriau o fewn gofal iechyd yng nghefn gwlad ac mewn ardaloedd trefol.

Mae Partneriaeth Cydwasanaethau GIG Cymru yn darparu amrywiaeth o wasanaethau a swyddogaethau cymorth i GIG Cymru, gan gynnwys gwasanaethau archwilio, cyfrifon, cyflogaeth a chyfreithiol.

Mae Arloesedd Anadlol Cymru yn gwmni nid-er-elw sydd wedi’i ddylunio i arloesi ym maes iechyd a lles yr ysgyfaint yng Nghymru. Cafodd y cwmni ei ariannu’n wreiddiol gan Lywodraeth Cymru, ac mae’n darparu gwasanaethau fel ymgynghori i sefydliadau sy’n chwilio am arbenigedd wrth iddynt ddatblygu neu wella cynhyrchion a thriniaethau anadlol, yn ogystal â dylunwyr adeiladau i sicrhau bod ansawdd aer yn cael ei optimeiddio.

Ymddiriedolaeth GIG Gwasanaethau Ambiwlans Cymru yw’r gwasanaeth ambiwlans cenedlaethol. Mae’r Ymddiriedolaeth yn darparu gwasanaethau, gan gynnwys gwasanaethau meddygol brys, y gwasanaeth 111, a chludiant cleifion nad yw’n argyfwng.

Mae Ymddiriedolaeth GIG Prifysgol Felindre yn darparu gwasanaethau canser arbenigol ledled de a chanolbarth Cymru drwy Ganolfan Ganser Felindre a Gwasanaeth Gwaed Cymru.

Iechyd Cyhoeddus Cymru yw’r asiantaeth iechyd cyhoeddus genedlaethol. Mae Iechyd Cyhoeddus Cymru yn gyfrifol am ddiogelu a gwella iechyd a llesiant a lleihau anghydraddoldebau iechyd.