Preifat

Mae BioMonde yn gwmni fferyllol a gofal clwyfau rhyngwladol. Ar hyn o bryd mae'r cwmni'n arbenigo mewn cynhyrchu a dosbarthu cynnyrch therapi digramennu gyda larfa (a elwir hefyd yn therapi cynrhon) i'w defnyddio mewn clwyfau cronig a chlwyfau sy’n anodd eu gwella. Mae’r cwmni’n cynhyrchu ac yn dosbarthu ei gynnyrch ledled y DU ac Ewrop o’i gyfleusterau cynhyrchu ym Mhen-y-bont ar Ogwr, y DU a Hambwrg, yr Almaen.

Mae Lion Laboratories yn gwmni yn y Barri sy’n arbenigo ym maes dadansoddi alcohol mewn anadl. Mae Lion Laboratories yn creu cynhyrchion sy’n cael eu defnyddio mewn practis cyffredinol, i drin alcoholiaeth a damweiniau ac achosion brys, at nifer o ddibenion, gan gynnwys rhoi diagnosis gwahaniaethol o goma, monitro coma ac anafiadau i’r pen, ymchwilio i achosion damweiniau ac osgoi rhyngweithiadau cyffuriau-alcohol a allai fod yn beryglus.

Mae EKF Diagnostics yn gwmni diagnosteg in vitro sy'n dylunio, datblygu, gweithgynhyrchu a marchnata dadansoddwyr pwynt gofal i fesur haemoglobin, HbA1c a glwcos at ddiben sgrinio a monitro clefydau, yn ogystal â chynhyrchu dyfeisiau labordy, profion a deunyddiau traul. Mae gan EKF hefyd uned gweithgynhyrchu dan gontract ar gyfer cynhyrchion diagnostig newydd.

Mae Ultrawave yn wneuthurwr dyfeisiau glanhau uwchsonig, y gellir eu defnyddio i lanhau offer meddygol fel offer gosod caniwla mewn theatrau llawdriniaethau neu offer deintyddol.

Mae TrakCel wedi datblygu OCELLOS, platfform meddalwedd ar gyfer rheoli’r gadwyn gyflenwi ar gyfer therapi celloedd a genynnau uwch. Mae'r platfform yn addas ar gyfer therapïau mewn lleoliadau treialon clinigol a masnachol. Mae TrakCel hefyd wedi lansio gwasanaeth ymgynghori i rannu eu harbenigedd mewn datblygu prosesau therapi celloedd a genynnau

Mae Tendertec yn gwmni iechyd digidol o Gaerdydd. Mae Tendertec wedi datblygu technolegau wedi’u pweru gan ddeallusrwydd artiffisial sy’n defnyddio caledwedd a meddalwedd i fonitro iechyd beunyddiol pobl mewn lleoliadau gofal fel cartrefi gofal.

Mae TeloNostix yn gwmni diagnosteg in vitro sy'n darparu dadansoddiad hyd telomerau eglur iawn ar gyfer cymwysiadau clinigol ac ymchwil. Gellir defnyddio’r dechnoleg hon i roi diagnosis i gleifion canser unigol, yn ogystal â rhagweld eu hymateb i driniaethau.

Mae SureChill yn darparu oergelloedd meddygol ar gyfer cyffuriau a brechlynnau sy’n synhwyrol i dymheredd i’w cadw’n oer mewn amgylcheddau caled. Nid oes angen cyflenwad pŵer cyson ar yr oergelloedd hyn ac felly gellir eu defnyddio mewn ardaloedd y gallai diffyg pŵer effeithio arnynt.

Mae The Science Behind yn wasanaeth ymchwil contract treialon clinigol sy'n cefnogi treialon clinigol cyfnod cynnar ym meysydd niwrowyddoniaeth a seicoleg. Mae'r cwmni'n cynnig offer ac arbenigedd ym maes Efelychu Magnetig Trawsgreuanol, electroffisioleg a phrofion gwybyddol.

Mae RSR yn ddatblygwr a chynhyrchydd diagnosteg feddygol blaenllaw gyda phwyslais penodol ar glefyd thyroid awtoimiwn, diabetes mellitus math 1, niwroimiwnoleg ac awtoimiwnedd uwcharennol. Mae cynhyrchion RSR yn cynnwys dyfeisiau diagnostig in vitro, adweithyddion a phecynnau i ganfod a mesur hunanwrthgyrff amrywiol at ddiben diagnosis a rheoli clefydau.