Preifat

Mae Rescape Innovation yn gwmni iechyd digidol sy’n canolbwyntio ar ddefnyddio realiti rhithwir wrth drin cleifion a helpu staff rheng flaen y GIG. Mae Rescape yn datblygu datrysiadau therapi gwrthdynnu realiti rhithwir, sy'n cefnogi lleddfu poen a gorbryder i gleifion pediatrig ac oedolion, yn ogystal â gweithwyr gofal iechyd. Mae Rescape hefyd yn darparu datrysiadau hyfforddi realiti rhithwir ar gyfer senarios a gweithdrefnau hyfforddi mewn lleoliadau gofal iechyd.

Mae R&D Surgical yn gwmni sy’n gweithgynhyrchu a dosbarthu offer a dyfeisiau meddygol. Mae'r cwmni'n cynnig amrywiaeth o gynhyrchion yn y meysydd cardiaidd, thorasig, deintyddol a llawfeddygaeth gyffredinol.

Mae Pelican Healthcare yn wneuthurwr cynnyrch meddygol tafladwy blaenllaw ar gyfer gofal stoma, gan gynnwys cydau.

Mae OnICs yn gwmni iechyd digidol o Gaerdydd sy’n arbenigo ym maes oncoleg. Mae OnICs wedi datblygu'r gyfres o gynhyrchion iNOTZ, sef cymwysiadau sy'n cipio data ymgynghori meddygol yn y clinig ac sy'n cynhyrchu nodyn meddygol ar gyfer yr ymgynghorydd yn awtomatig.

Mae Nova Bioelectrics yn gwmni dylunio sy'n arbenigo mewn helpu cwmnïau i ddylunio a chreu cynnyrch dyfeisiau meddygol ym maes niwrowyddoniaeth. Mae’r gwasanaethau a gynigir gan Nova yn cynnwys dylunio, datblygu, prototeipio a phrofi cynnyrch.

Mae Neurochase yn fusnes newydd yng Nghaerdydd sydd wedi datblygu system cyflenwi cyffuriau ar gyfer darparu therapïau i'r system nerfol ganolog gan ddefnyddio Darpariaeth Darfudiad Gwell, gan gynnwys therapïau celloedd a genynnau.

Mae Momentum Biosciences wedi datblygu SepsiSTAT, system prosesu samplau gwaed a chanfod organebau sy'n hwyluso diagnosis cyflym o heintiau llif gwaed.

Ffurfiwyd Biodexa Pharmaceuticals yn sgîl uno Midatech Pharma o Gaerdydd, a Bioasis o’r Unol Daleithiau yn 2022. Roedd Midatech yn arbenigo mewn datblygu technolegau ar gyfer darparu cyffuriau’n well, tra bod Bioasis yn datblygu cyffuriau i drin anhwylderau’r system nerfol ganolog. Mae Biodexa wedi cyfuno'r technolegau hyn i ddatblygu piblinell o gynhyrchion sydd wedi'u hanelu at ganserau sylfaenol a metastatig yr ymennydd. Mae prif gynnyrch y cwmni’n cael ei asesu mewn treialon clinigol ar hyn o bryd.

Mae MeOmics yn gwmni deillio o Brifysgol Caerdydd sydd wedi creu prawf ffisiolegol ar gyfer clefydau seiciatrig gan ddefnyddio cyfuniad o ddeallusrwydd artiffisial a bôn-gelloedd i ragfynegi ymateb claf i therapi cyffuriau. Gellir defnyddio'r llwyfan hwn ym maes darganfod cyffuriau fel prawf sgrinio cyn-glinigol, ac efallai y bydd yn cael ei ddefnyddio yn y dyfodol mewn diagnosis clefydau a meddygaeth bersonol.

Mae Medi2data yn gwmni iechyd digidol o Gaerdydd. Mae’r cwmni wedi datblygu pecynnau meddalwedd sy’n integreiddio â chofnodion meddygol electronig a ddefnyddir mewn meddygfeydd meddygon teulu i gynhyrchu adroddiadau meddygol.