Biotechnoleg

Cwmni biotechnoleg yw Copner Biotech sy’n darparu cynhyrchion a gwasanaethau ym maes meithrin celloedd 3D. Mae proses ddylunio a gweithgynhyrchu Copner yn galluogi cynhyrchu sgaffaldau meithrin celloedd i gynrychioli amodau ffisiolegol yn y corff yn well, gan ddarparu manteision arbrofol ar gyfer ymchwil mewn meysydd sy'n astudio microamgylcheddau celloedd.

Mae BioExtractions Wales yn darparu gwasanaeth contract o gynhyrchion unigol ac ar wahân fel peptidau a moleciwlau synthetig mawr o gymysgeddau cymhleth. Cynigir y gwasanaethau hyn i’r diwydiannau fferyllol, agrocemegol, cemegol a bwyd.

Mae Dynamic Extractions yn gwmni deillio llwyddiannus o Brifysgol Brunel (sydd wedi’i leoli yn Nhredegar erbyn hyn). Cafodd ei sefydlu i fasnacheiddio’r dechnoleg Cromatograffaeth Gwrthgerrynt Hydrodynamig (HdCCC) a ddatblygwyd gan Sefydliad Biobeirianneg Brunel (BIB). Mae gan y dechnoleg y potensial i gael ei ddefnyddio ym maes sgrinio trwybwn uchel ar gyfer darganfod cyffuriau a datblygu prosesau mewn defnydd masnachol ar raddfa fawr.

Mae Jellagen yn gwmni biotechnoleg sydd wedi’i leoli yng Nghaerdydd. Mae’r cwmni’n arbenigo mewn datblygu colagen gradd ymchwil sy’n deillio o sglefrod môr. Mae gan colagen sglefrod môr nifer o gymwysiadau posibl mewn gwyddoniaeth a meddygaeth, gan gynnwys cynhyrchu sgaffaldiau orthopedig, gorchuddion clwyfau a sgaffaldiau celloedd ar gyfer meithrin celloedd a therapi celloedd.

Mae Continuum Blue yn gwmni datblygu technoleg sy'n canolbwyntio ar efelychiadau cyfrifiadurol ar gyfer amrywiaeth o ddiwydiannau, gan gynnwys ym maes meddygaeth a biotechnoleg. Mae efelychiadau’r cwmni wedi cael eu defnyddio i ddatblygu mewnblaniadau orthopedig ac i fodelu bioadweithyddion.

Mae ABClonal yn gyflenwr labordai sydd wedi’i leoli ym Mhort Talbot. Mae ABClonal yn cyflenwi dros 15,000 o wrthgyrff monoclonaidd a polyclonaidd, offer bioleg foleciwlaidd, dros 1,000 o broteinau sydd wedi’u hailgyfuno, pecynnau ELISA, cyflenwadau labordy a gwasanaethau i ddatblygu deunydd crai IVD a chyflenwi cyffuriau biolegol.

Mae ProColl yn gwmni bioleg synthetig sy’n cynhyrchu colagen o wartheg a colagen heb fod o anifeiliaid, ar raddfa fawr. Defnyddir y colagen hwn mewn diwydiannau fel dyfeisiau meddygol, therapi celloedd a meddygaeth adfywiol, yn ogystal ag ym maes cynhyrchu bwyd.

Mae ARGiP yn cynhyrchu cynnyrch sylfaenol a ddefnyddir at ddibenion bioddiogelwch a milfeddygol. Prif gynnyrch ARGiP yw Pepsin (ensym proteolytig a gynhyrchir gan ddefnyddio stumog mochyn) a lipidau bloneg y bol (lipidau wedi’u neilltuo o feinwe mochyn sy’n arddangos priodweddau therapiwtig), yn ogystal ag offer homogenaidd.

Mae AMPED PCR yn darparu cynhyrchion PCR fel adweithyddion ar gyfer ymchwilwyr yn y meysydd Gwyddorau Bywyd a Marchnadoedd Cymhwysol.

Mae Agxio yn gwmni deallusrwydd artiffisial, gwyddor data a dysgu peirianyddol sy’n arbenigo yn y diwydiannau Biotechnoleg, gwyddorau bywyd a gwyddorau amaethyddol, gan gynnwys ar gyfer dadansoddi microbïom, dylunio cyffuriau parasitoleg a dadansoddi ymddygiad anifeiliaid.