Technoleg Feddygol

Mae Thermo Fisher yn ddarparwr mawr o offer meddygol, offerynnau dadansoddol, adweithyddion a nwyddau traul, meddalwedd a gwasanaethau i'r diwydiant gwyddorau bywyd. Yn 2011, prynodd y cwmni Sterilin, darparwr nwyddau traul labordy, fel dysglau petri, pibedau a photeli casglu samplau, sydd wedi’i leoli yn ne Cymru. Yn ogystal, mae Thermo Fisher yn berchen ar Synexus, sefydliad sy'n cynnal treialon clinigol ar gyfer cwmnïau fferyllol a Biotechnoleg. Mae gan Synexus glinig yng Nghaerdydd.

Mae Revvity (oedd yn arfer bod yn rhan o Perkin Elmer) yn ddarparwr offer ar gyfer ymchwil a datblygu mewn labordai (e.e. offerynnau dadansoddi genomig a phroteinau, imiwnobrofiadau a llinellau celloedd), llwyfannau awtomeiddio labordai, a phrofion diagnostig clinigol ar gyfer amrywiaeth o glefydau. Mae’r cwmni hefyd yn darparu gwasanaethau technegol, gan gynnwys sgrinio a phrofi cyn-glinigol a chlinigol. Mae’r cwmni wedi’i leoli yn yr Unol Daleithiau, ac mae ganddo gyfleuster gweithgynhyrchu yn Llantrisant

Mae Flogas yn cyflenwi Nwy Petrolewm Hylifedig i gwsmeriaid cartref a busnes. Yn 2012, prynodd Flogas y cwmni Medical GAS Solutions Limited, sef cwmni nwy yn y Fflint sy’n arbenigo mewn nwy meddygol. Mae Flogas bellach yn cyflenwi nwy meddygol i’r diwydiant gofal iechyd, gan gynnwys i ysbytai a’r gwasanaethau brys.

Mae Winncare Group yn gwmni offer meddygol sy’n arbenigo mewn gwelyau meddygol, dodrefn ysbyty a matresi therapiwtig. Mae Winncare wedi’i leoli ym Manceinion, ond mae pencadlys Mangar International, sef is-gwmni sy’n cyflenwi datrysiadau codi diogel a gofal briwiau pwyso ym Mhowys.

Sefydliad ymchwil contract yw ICON sy’n darparu gwasanaethau datblygu allanol i’r diwydiannau biotechnoleg, fferylliaeth a dyfeisiau meddygol ledled y byd. Mae’n darparu gwasanaethau arbenigol sy’n rhychwantu cylch bywyd datblygu cynnyrch ar draws ystod o feysydd therapiwtig. Mae gan ICON safle yn Abertawe sy’n darparu gwasanaethau ymchwil clinigol, gan gynnwys gwyliadwriaeth ffarmacolegol.

Mae Cytiva yn ddarparwr technolegau a gwasanaethau sy’n datblygu ac yn cyflymu’r gwaith o ddatblygu, cynhyrchu a darparu therapiwteg, gan gynnwys biotherapiwteg, therapïau celloedd a genynnau a therapiwteg mRNA. Arferai Cytiva fod yn rhan o GE Healthcare Life Sciences ac mae’n weithredol mewn 40 o wledydd. Mae cyfleuster gweithgynhyrchu Cytiva yng Nghaerdydd yn cynhyrchu technolegau biobrosesu untro a ddefnyddir i wneud brechlynnau a chynhyrchion biofferyllol.

Mae UPG yn ddarparwr arloesol, byd-eang o atebion datblygu a gweithgynhyrchu cynnyrch. Mae gennym hanes o lwyddo o ran cyflenwi cwmnïau gofal iechyd o’r radd flaenaf, o gydrannau plastig wedi’u mowldio â chwistrell o'n hystafell lân Dosbarth 7 ISO, hyd at weithgynhyrchu dan gontract gwasanaeth llawn. Mae arbenigedd, systemau a phrosesau byd-eang UPG wedi'u teilwra i fodloni gofynion llym cynhyrchion gofal iechyd heddiw. 

Mae Microchip Technology Incorporated yn darparu datrysiadau rheoli sydd wedi'u hymgorffori ar draws amrywiaeth o ddiwydiannau. Mae gan y cwmni safle yng Nghil-y-coed sy’n darparu gwasanaethau microelectroneg sy’n cwmpasu cylch bywyd microsglodyn, gan gynnwys dylunio, datblygu, cydosod, profi a gwerthu, ac fe’u defnyddir yn y diwydiannau meddygol, cyfathrebu, diwydiannol, awyrofod ac amddiffyn.

Mae Norgine yn datblygu, yn gweithgynhyrchu ac yn masnacheiddio dyfeisiau meddygol a chynnyrch fferyllol arbenigol. Mae portffolio cynnyrch y cwmni yn cynnwys dyfeisiau a chyffuriau wedi'u brandio ym meysydd gastroenteroleg, hepatoleg, a chanser a gofal cefnogol. Mae pencadlys Norgine yn yr Iseldiroedd. Mae Norgine UK wedi’i leoli yn Nhir-y-berth.

Mae Siemens Healthineers, is-gwmni Siemens AG, yn gwmni technoleg feddygol sy’n dylunio, datblygu, cynhyrchu a dosbarthu systemau delweddu diagnostig a therapiwtig, diagnosteg labordy a thechnolegau meddygaeth foleciwlaidd, yn ogystal â darparu gwasanaethau mentergarwch a digidol. Mae pencadlys Siemens Healthineers yn yr Almaen, ac mae ganddynt safle yn Llanberis, lle maen nhw’n gweithgynhyrchu adweithyddion IMMULITE, a ddefnyddir mewn profion imiwnedd gwaed IMMULITE i wneud diagnosis o ystod eang o glefydau.