Cyfeiriadur Arloesedd – Cymru

Mae Academi Tegwch Iechyd, Iechyd Ataliol a Llesiant Prifysgol Bangor yn Academi Dysgu Dwys (ILA), sydd wedi cael ei datblygu ar y cyd â Bwrdd Iechyd Prifysgol Betsi Cadwaladr. Mae’r Academi’n canolbwyntio ar gyflymu’r gwaith o hyrwyddo a mabwysiadu iechyd ataliol mewn ymarfer ar draws ecosystem gofal iechyd integredig (fel iechyd a gofal cymdeithasol, y trydydd sector, tai, addysg a diwydiannau gwyddorau bywyd) ac mewn cyd-destun dwyieithog. Bydd yn datblygu rhwydwaith o arweinwyr gwybodus a deinamig sy’n gallu sbarduno newid er mwyn mynd i’r afael ag iechyd a heriau cymdeithasol cysylltiedig.

Mae Acuity Law yn gwmni cyfreithiol gyda swyddfeydd yng Nghaerdydd ac Abertawe. Mae’r cwmni’n gweithio mewn amrywiaeth o sectorau, gan gynnwys gofal iechyd a thechnoleg feddygol, gydag arbenigedd mewn delio ag achosion o uno a chaffael, trefniadau ecwiti a chontractau masnachol.

Mae AaGIC (sy’n rhan o GIG Cymru) yn gyfrifol am addysgu, hyfforddi, datblygu a siapio’r gweithlu gofal iechyd yng Nghymru.

Mae Afferent Medical Solutions yn gwmni meddygaeth bioelectroneg sy’n datblygu datrysiadau niwromodwleiddio sy’n seiliedig ar ddyfeisiau ar gyfer trin clefydau’r system gylchredol a meysydd therapiwtig eraill.

Mae Afon Technology wedi datblygu Glucowear, monitor glwcos gwaed parhaus nad yw’n fewnwthiol, y gellir ei wisgo, sy’n cysylltu â chymhwysiad symudol. Nid yw'r ddyfais wedi'i lansio eto, ond gallai fod yn addas i gleifion â diabetes fonitro lefelau glwcos eu gwaed.

Mae Age UK yn ceisio creu byd lle gall pobl hŷn fyw eu bywydau heb dlodi, unigedd ac esgeulustod. Mae’n codi ymwybyddiaeth o faterion sy’n effeithio ar bobl hŷn yn y DU a thramor, yn ymchwilio ac yn ymgyrchu dros newidiadau mewn polisi ac arferion, ac yn cynnig cymorth ymarferol i bobl hŷn dan anfantais. Mae'n cael ei ariannu gan unigolion, cwmnïau ac ymddiriedolaethau.

Mae Agile Kinetic yn gwmni meddalwedd fel dyfeisiau meddygol (SaMD) sy'n arbenigo mewn dadansoddi symudiad gan ddefnyddio dyfeisiau tabled, gwe-gamerâu a ffonau clyfar safonol. Mae’r meddalwedd blaenllaw MoveLab® yn defnyddio data sy'n seiliedig ar y golwg a synwyryddion ffonau clyfar i gynnal asesiadau symud sy'n olrhain ystod ac ansawdd symudiad cymalau lluosog, yn ogystal â digideiddio asesiadau symudiad clinigol; gan gynnwys dadansoddi cerddediad, prawf Codi-a-Cherdded wedi’i amseru, a phrawf Codi-ac-Eistedd am 30 eiliad. Mae modd dadansoddi drwy ddefnyddio dyfeisiau clinigwyr neu gleifion, naill ai wyneb yn wyneb neu o bell, sydd â rhaglenni sy’n ymdrin ag orthopedeg, cyflyrau cyhyrysgerbydol, niwroleg, heneiddio’n iach, orthoteg a phrostheteg.

Mae Agxio yn gwmni deallusrwydd artiffisial, gwyddor data a dysgu peirianyddol sy’n arbenigo yn y diwydiannau Biotechnoleg, gwyddorau bywyd a gwyddorau amaethyddol, gan gynnwys ar gyfer dadansoddi microbïom, dylunio cyffuriau parasitoleg a dadansoddi ymddygiad anifeiliaid.

Mae Ai Healthcare yn cyflenwi offer technegol ar gyfer practisau meddygol, deintyddol a milfeddygol, gan gynnwys cyfarpar tawelyddu nwy, delweddu digidol, dadhalogi a datrysiadau llawfeddygol. Mae’r cwmni hefyd yn darparu gwasanaethau sy’n ymwneud â dylunio ac adnewyddu ystafelloedd llawfeddygol.

Mae Alesi Surgical yn datblygu ac yn masnacheiddio cynnyrch sy’n gwella diogelwch, effeithlonrwydd a chanlyniadau triniaethau llawfeddygol manwl. Sefydlwyd y cwmni fel cwmni deillio o Athrofa Therapïau Lleiaf Ymyrrol Cymru (WIMAT). Mae cynnyrch Alesi Surgical, ULTRAVISION ac ULTRAVISION2, yn lleihau mwg llawfeddygol mewn ystafelloedd llawfeddygol heb fod angen cyfnewid CO2, gan wella gwelededd, lleihau'r angen i lanhau camerâu a lleihau’r defnydd o CO2 mewn adrannau. Yn ddiweddar, mae’r cwmni wedi cael cymeradwyaeth FDA ar gyfer ULTRAVISION2.